Qəzza zolağında hərbi əməliyyatlar zamanı saxlanılan təxminən 115 fələstinli tibb işçisi hələ də İsrailin nəzarətindədir.
“Xəbərsiz” bildirir ki, Qəzza sülh planının bir hissəsi olaraq, İsrail hakimiyyəti İsrail həbsxanalarında ömürlük və ya uzunmüddətli həbs cəzası çəkən 250 fələstinli məhbusu, həmçinin 2023-cü il oktyabrın 7-də hərbi əməliyyatlar başlayandan bəri İsrail qüvvələri tərəfindən saxlanılan 1700-dən çox anklav sakinini, girov götürdükləri 20 nəfərin qaytarılması müqabilində azad etməyi öhdəsinə götürmüşdü. Mübadilə bazar ertəsi Beynəlxalq Qızıl Xaç Komitəsinin vasitəçiliyi ilə baş verib.
Hüquq müdafiəçiləri azadlığa çıxanlar arasında 55 tibb işçisinin olduğunu bildiriblər. Bununla belə, İsrail hakimiyyəti tərəfindən saxlanılan Qəzzadan olan 115 həkim, tibb bacısı və digər xəstəxana işçisi hələ də həbsdədir.
Qeyd edək ki, 2024-cü il dekabrın sonlarında həbs edilən Qəzzanın Kamal Advan xəstəxanasının direktoru Hussam Abu Safiya İsrailin azadlığa buraxılanlar siyahısına daxil edilməyib. Onun saxlanması Ümumdünya Səhiyyə Təşkilatı və bir sıra beynəlxalq QHT-lər tərəfindən pislənib. İsrail hakimiyyəti öz növbəsində Kamal Advanı terror fəaliyyətlərində iştirakda və Fələstinin radikal HƏMAS hərəkatını dəstəkləməkdə ittiham edib.
Səma Sevyarlı