Dini Qurumlarla İş üzrə Dövlət Komitəsinin tabeliyində Mənəvi Dəyərlərin Təbliği Fondu Ramazan bayramı ilə əlaqədar iki xarici ölkədə iftar süfrələri təşkil edəcək.
“Xəbərsiz” İqtisadiyyat.az-a istinadən xəbər verir ki, bu barədə Fonddan məlumat əldə edilib.
Məlumata görə, iftar süfrələrinin Türkiyə və Gürcüstanda təşkil olunacağı planlaşdırılıb.
Fond iftar süfrələrinin təşkilini yerli şirkət olan “The Event Company” MMC-yə həvalə edib və onunla müqavilə bağlayıb. Müqaviləyə əsasən, şirkət iftar süfrələrini 363 646,8 manata təşkil edəcək.
Məlumata üçün onu da bildirək ki, Fond ötən il də Türkiyə və Gürcüstanda iftar süfrələri təşkil edib və həmin vaxt bağlanılmış müqaviləyə əsasən, iftar süfrələrini “Laguna Group” şirkəti 198 948 manata hazırlayıb.
Beləliklə, ötən illə müqayisədə Fondun Türkiyə və Gürcüstanda iftar süfrələrinə xərci 164 698,8 manat və ya 82,8% artıb.
Qeyd edək ki, “The Event Company” şirkəti paytaxtın Binəqədi rayonu, Fərman Məlikov küçəsi ev.2V, m.44 ünvanında qeydiyyatdan keçib. Şirkətin qanuni təmsilçisi Mikayılov Müşfiq Gözəl oğludur. Şirkətin hazırda həm də Dövlət Vergi Xidmətinin Bakı şəhəri Lokal Gəlirlər Baş İdarəsinə 9846.55 manat vergi borcu da mövcuddur.
