İranda öldürülən dini lider Əli Xamenei üçün genişmiqyaslı dəfn mərasimi keçirilir. Mərasimə yüz minlərlə insan qatılıb, İran rəsmiləri isə qarşıdakı günlərdə ümumilikdə 12-20 milyon nəfərin mərasimlərdə iştirak edəcəyini gözlədiklərini açıqlayıblar.
“Xəbərsiz” bu barədə xarici mediaya istinadən xəbər verir.
Məlumata görə, ABŞ Prezidenti Donald Trampın başına 100 milyon dollar mükafat vəd edən plakatlar da mərasim zamanı diqqət çəkib. Bu hadisə ölkədə həssas atəşkəs şəraitinin davam etdiyi bir vaxta təsadüf edib.
Əli Xamenei 1989-cu ildən etibarən İran İslam Respublikasına rəhbərlik edib. Onun dəfn mərasimi cümə günü başlayıb və gələn həftə ərzində həm İranda, həm də İraqda müxtəlif anım tədbirlərinin keçirilməsi planlaşdırılır.
Təkcə Tehranda keçirilən mərasimlərə 10 milyondan çox insanın qatılacağı gözlənilir. Böyük izdiham səbəbindən təhlükəsizlik tədbirləri gücləndirilib, dövlət mediası isə vətəndaşları sıxlıqla bağlı ehtiyatlı olmağa çağırıb.
İranın rəsmi İRNA agentliyinin məlumatına görə, bazar günü Böyük Musalla məscidi və ətrafındakı tibb məntəqələrinə 4 mindən çox şəxs müraciət etsə də, ölüm faktı qeydə alınmayıb. İştirakçıların istidən qorunması üçün onların üzərinə su püskürdülüb, yaşlı şəxslərin bir qisminin isə xərəkdə daşındığı bildirilib.
Məlumata əsasən, Əli Xameneinin tabutu Tehrandakı hücumlarda həyatını itirdiyi bildirilən dörd qohumunun tabutları ilə yanaşı yerləşdirilib. Onların arasında bir yaşlı nəvəsi Zəhra Məhəmmədi Qolpayeqaninin də olduğu qeyd edilir.
Diqqət çəkən məqamlardan biri isə yeni lider olduğu iddia edilən oğlu Müctəba Xameneinin mərasimdə görünməməsi olub. Əvəzində Əli Xameneinin digər oğulları Məsud, Mustafa və Meysam, eləcə də İran Prezidenti Məsud Pezeşkian və digər yüksək vəzifəli şəxslər dəfn mərasimində iştirak ediblər.
Müctəba Xameneinin yaralandığı ilə bağlı yayılan iddialar onun atasının dəfn mərasiminə qatılmaması ilə daha da güclənib. The New York Times qəzetinin məlumatına görə, təhlükəsizlik xidmətləri onun hətta səsli müraciət yaymasına da icazə verməyib. İddialara əsasən, səs yazısının İsrail tərəfindən geolokasiya olunaraq onun yerinin müəyyən edilə biləcəyi ehtimalı nəzərə alınıb. Bildirilir ki, Müctəba Xamenei hazırda yalnız əlyazma məktublar vasitəsilə göstərişlər verir.
Yüz minlərlə insanın iştirak etdiyi dəfn mərasiminə isə Qum şəhərində dini məktəblərdə dərs deyən 97 yaşlı şiə alimi Cəfər Sübhani rəhbərlik edir. Mərasimdə Xamenei ailəsinin üzvləri və dövlət rəsmiləri iştirak etsələr də, Müctəba Xamenei cənazə namazında görünməyib.
