Xəbər verdiyimiz kimi, AXCP sədri Əli Kərimliyə qarşı Cinayət Məcəlləsinin 278.1-ci maddəsi ilə ittiham irəli sürülüb.
CM-in 278 maddəsi “Hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə”ni əhatə edir.
Mövzu ilə bağlı “Xəbərsiz”ə danışan Milli Məclisin deputatı Elman Nəsirov bildirir ki, Azərbaycan Xalq Cəbhəsi Partiyasının sədri Əli Kərimlinin mənzilində Dövlət Təhlükəsizlik Xidməti axtarış həyata keçirib. Axtarış “Ramiz Mehdiyev” işi ilə birbaşa bağlı olaraq reallaşdırılıb. Axtarış prosesində əldə edilən dəlillər göstərir ki, Ramiz Mehdiyev əslində siyasi drijor funksiyasını həyata keçirirdisə, Əli Kərimli həmin orkestrdə brinci skripkaçı idi.
“Məlum olur ki, Əli Kərimlinin həm də 2012-ci ildə Abbas Abbasovun yaratdığı Rusiya Azərbaycan Təşkilatları İttifaqı – yəni, “Milyarderlər ittifaqı” ilə çox sıx əməkdaşlığı olub. Məhz “Milyarderlər İttifaqı”nın maliyyə dəstəyi, onun birbaşa köməkliyi ilə Əli Kərimli, Gültəkin Hacıbəyli, Cəmil Həsənli birlikdə Milli Şura yaradıblar. Əslində isə o, antimilli şura idi”, – deyə plenari bildirib.
E. Nəsirov əlavə edib ki, bu yolla da onlar Rusiyanın layihəsi olaraq 2013-cü ildə hakimiyyətə gəlmək istəyirdilər. Bu planlar alt-üst oldu. Bundan sonra yenə də Ramiz Mehdiyevin birbaşa dəstəyi və gizli himayədarlığı ilə onlar Azərbaycanda səfərbər olmuş cəmiyyətin parçalanması, vətəndaş həmrəyliyinin pozulması, xalq – hakimiyyət birliyinin iflası ilə bağlı fəaliyyət göstəriblər.
“Artıq faktlar və dəlillər bunu sübuta yetirir. Eyni zamanda bu da məlumdur ki, artıq DTX Əli Kərimlini cinayət Məcəlləsinin 278.1-ci maddəsi ilə (Hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə) ittiham edib. Bu çox ağır ittihamdır. Belə olan təqdirdə artıq Azərbaycan Xalq Cəbhəsi Partiyasının bundan sonrakı fəaliyyəti ilə bağlı məsələlər də müzakirə predmetinə çevrilir”.
Deputat bildirir ki, hadisələr fonunda AXCP-nin fəaliyyəti dayandırılmaldır:
“Əgər bir partiya və yaxud da onun rəhbəri “zorakı yolla hakimiyyəti devirməkdə” ittiham olunursa, belə olan vəziyyətdə onun rəhbərlik etdiyi partiya da bu prosesin ideoloji istiqamətini müəyyən edib və onun icrası məsələləri ilə məşğul olub. Deməli, bu partiyanın Azərbaycan siyasi sistemində mövcudluğuna heç bir əsas yoxdur. Bu partiyanın fəaliyyəti dayandırılmalıdır. Hesab edirəm ki, bu, hazırkı reallıqda təkcə dövlət siyasəti deyil, həm də ictimai sifarişdir. Hər kəs bilməlidir ki, cinayət yolunu seçdinsə, mütləq cəza alacaqsan”.
Müsahibimiz vurğulayır ki, artıq antimilli şuranın digər üzvü Gültəkin Hacıbəyli də İstanbuldan Azərbaycana deportasiya edilib. “Şuranın” sədri Cəmil Həsənlinin isə Dubaya qaçmaq niyyəti baş tutmayıb. Onun ölkədən çıxışına “STOP!” qoyulub. Yəqin ki, yaxın zamanda biz “Ramiz Mehdiyev” işi ilə bağlı yeni detalların da şahidi olacağıq. Çox güman ki, bu prosesə cəlb olunun şəxslərin siyahısı artacaq. Qanunun aliliyi prinsipindən çıxış edərək cinayətkarların cəzalandırılması baş tutacaq.
Qeyd edək ki, Əli Kərimlinin ittiham edildiyi 278.1-ci maddədə “Azərbaycan Respublikasının Konstitusiyasına zidd olaraq hakimiyyətin zorla ələ keçirilməsinə, yaxud hakimiyyətin zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlər” nəzərdə tutulur.
Bu maddə üzrə cəza on iki ildən iyirmi ilədək müddətə azadlıqdan məhrumetmə və ya ömürlük azadlıqdan məhrumetmə ilə cəzalandırılır.
Ziyafət Əlisoy
