Erməni deputat Ruben Rubinyan NATO Parlament Assambleyasının 108-ci Rose-Roth Seminarının açılışında Ermənistanın xarici siyasət prioritetlərinə, Azərbaycan və Türkiyə ilə münasibətlərin normallaşdırılması proseslərinə toxunub.
“Xəbərlər” Ermənistan mətbuatına istinadən xəbər verir ki, deputat bildirib ki, hazırda keçmişdəki münaqişələrə son qoymaq, sülh və qonşuluq şəraitində gələcək qurmaq üçün tarixi imkan var.
“Bizim borcumuz bu fürsəti əldən verməmək və onu sabitlik və inkişaf reallığına çevirməkdir”, – Rubinyan qeyd edib.
Vaşinqtonda imzalanmış sənədlərə toxunan parlamentari qeyd edib ki, Ermənistan kommunikasiyaların açılmasının zəruriliyini vurğulayır.
O, Ermənistan ərazisində həyata keçiriləcək erməni-amerikan əməkdaşlığı çərçivəsində planlaşdırılan “Tramp yolu” layihəsini də xüsusi qeyd edib.
Onun sözlərinə görə, bu təşəbbüs infrastruktur layihəsindən daha geniş əhəmiyyətə malikdir və bütün region üçün etimad və əməkdaşlıq körpüsünə çevrilə bilər.
Türkiyə ilə münasibətlərin normallaşmasından danışan Rubinyan bunun Ermənistanın xarici siyasətinin prioritetlərindən biri olduğunu vurğulayıb:
“Münasibətlərin normallaşması regionumuza təkcə sabitlik və firavanlıq gətirməyəcək, həm də qlobal təhlükəsizliyin möhkəmlənməsinə töhfə verəcək. Biz bu gün diplomatik əlaqələr qurmağa və sərhədləri açmağa hazırıq”, – deyə o, Türkiyənin Ermənistanın hazırlığına cavab verəcəyinə ümid etdiyini bildirib.
Elşən Balayev
