“BakuBus” MMC ötən gün sosial şəbəkələrdə yayılan videogörüntü ilə bağlı məlumat yayıb və baş verən hadisə zamanı yaranan narahatlığa görə üzr istəyib.
“Xəbərsiz” xəbər verir ki, bu barədə “Qafqazinfo”ya MMC-nin Mətbuat xidmətindən məlumat verilib.
“22 oktyabr 2025-ci il tarixində səhər saatlarında “BakuBus” MMC-nin istismarında olan 3 nömrəli marşrut üzrə hərəkətdə olan olan 99-JU-240 dövlət qeydiyyat nişanlı avtobusda bir qrup sərnişinin arxa qapıdan minməyə çalışması səbəbindən sürücü ilə sərnişinlər arasında insident baş verib. Sürücü isə bunun müəyyən edilmiş qaydalara uyğun olmadığını izah edərək, təlimata uyğun hərəkət edib. Bu qayda Nazirlər Kabinetinin təsdiq etdiyi “Avtomobil nəqliyyatı ilə sərnişin və baqaj daşınması Qaydaları”nın 4.29.3-cü bəndinə əsaslanır. Həmin norma üç qapısı olan avtobuslarda sərnişinlərin düşməsinin orta və arxa, minməsinin isə ön qapıdan həyata keçirilməsini nəzərdə tutur. Bu tələbin məqsədi ictimai nəqliyyatda xidmətin təhlükəsiz, intizamlı və nəzarətli şəkildə təşkili ilə bağlıdır və qayda yalnız “BakuBus” MMC-yə deyil, ölkə üzrə bütün sərnişindaşıma subyektlərinə şamil olunur”, – məlumatda qeyd olunub.
Qurumdan həmçinin bildirilib ki, hadisədən sonra avtobus hərəkətini davam etdirib, lakin “Gənclik” metrostansiyası yaxınlığında texniki nasazlıq səbəbindən dayanıb: “Sürücü yaranan nasazlıq barədə dərhal “BakuBus” MMC-nin Monitorinq Mərkəzinə məlumat verib və sərnişinlərin səfərini təmin etmək məqsədilə onları düşürərək eyni istiqamətdə hərəkət edən digər 3 nömrəli avtobusuna yönləndirib. Nasaz avtobus daha sonra “Dərnəgül” NMM-ə gətirilib və burada Texniki Servis Xidməti tərəfindən texniki nasazlıq aradan qaldırılıb. Hadisənin baş verməsindən sonra “BakuBus” MMC məsələni diqqətə alaraq sürücü ilə profilaktik söhbət aparıb və ona bu kimi hallarda daha təmkinli davranması ilə bağlı müvafiq təlimatlar verilib “BakuBus” MMC olaraq sərnişinlərdən ictimai nəqliyyatdan istifadə zamanı müəyyən edilmiş qaydalara riayət etmələrini və xidmətin nizamlı təşkili üçün bir-birinə anlayışla yanaşmalarını xahiş edirik”.
Qeyd edək ki, sosial platformalarda 3 nömrəli avtobusda çəkilən görüntülər yayılıb. İddia olunur ki, avtobus sürücüsü arxa qapıdan avtobusa minən sərnişini yolda düşürüb, sərnişinlərlə kobud rəftar edib.