“Düşünürəm ki, Azərbaycanla bağlı Türkiyə ərazisindən davamlı dezinformasiya yayan bir sıra media resurslarının “nüfuzlu media təsisatları” kimi təqdim edilməsi, həmçinin sosial şəbəkələrin Türkiyə türkcəsində olan seqmentindəki bəzi səhifələrin təxribatlarına qardaş ölkənin ictimai rəyinin, hətta cüzi bir hissəsini ifadə edən məzmunlar kimi yanaşılması kökündən yanlışdır”.
Bu fikirləri “Xəbərsiz”ə açıqlamasında Milli Məclisin deputatı Elçin Mirzəbəyli deyib.
O bildirib ki, bu cür hallarda Azərbaycanın peşəkar media resursları, siyasətçiləri, ekspertləri soyuqqanlı olmalıdırlar:
“Belə məsələlərdə Azərbaycanın peşəkar media resursları, siyasətçiləri, ekspertləri və vətəndaş mövqeyindən çıxış edən sosial şəbəkə fəalları maksimum soyuqqanlılıq və təmkin nümayiş etdirməli, Azərbaycan-Türkiyə qardaşlığına qənim kəsilən dairələrin iç üzünü açıb ortaya qoymalıdırlar. Heç bir halda təxribat xarakterli məzmunlara eyni üslub və ritorika ilə cavab verilməməlidir. Əksinə, hər addımda Azərbaycan-Türkiyə birliyinin sarsılmazlığı vurğulanmalıdır”.
Deputat qeyd edib ki, Türkiyədə Azərbaycan-İsrail münasibətləri ilə bağlı həqiqətdən kənar danışan qüvvələr var:
“Bəlli olduğu kimi, Türkiyənin ictimai rəyində İsrailə olan münasibətdən istifadə edən bəzi kənar qüvvələr və onların qardaş ölkədəki uzantıları mütəmadi olaraq, Azərbaycan-İsrail münasibətləri ilə bağlı həqiqətə uyğun gəlməyən, bəzən hətta sıradan bir informasiyanı belə təhlil etməyi, ağı qaradan, yalanı həqiqətdən seçməyi bacarmayan birinin qəhqəhə ilə qarşılayacağı iddialarla çıxış edirlər. Daha sonra gündəmə atılan ucuz mövzular ətrafında troll şəbəkəsinin fasiləsiz ideoloji hücumu, yalanlara daha emosional yük qatmaqla onu inandırıcı etməyə çalışan, insanların dini hisslərini istismar edən xaricdən idarə olunan “zombi” qruplarının cığır-bağırı sosial şəbəkələri başına götürür. Təəssüf ki, bəzən bu prosesin içərisində Türkiyədə nəyin bahasına və nə yolla olursa-olsun hakimiyyətə can atan, beyinlərini onlara hakimiyyət vəd edən xarici qüvvələrə, həm də Türkiyə düşmənlərinə icarəyə vermiş siyasət dəllalları da yer alırlar.
Parlamentari əlavə edib ki, bu tip qüvvələr Azərbaycanda da fəaliyyət göstərir:
“Məgər bizdə belələri yoxdur? Məsələn, Azərbaycan ərazilərinin işğaldan azad edilməsi, ölkəmizin ərazisində 200 ilə yaxın davam edən separatizmə son qoyulması, suverenliyimizin bütün ərazilərimizdə bərpa olunması kimi misilsiz tarixi uğurun, məhz Prezident, Ali Baş Komandan İlham Əliyevin iti zəkası, xarakteri və qətiyyətli liderliyi ilə gerçəkləşməsi reallığı ilə barışa bilməyən klassik nüfuz müvəkkili, siyasi cırtdan Əli Kərimli öz yandaşları ilə birlikdə gecə-gündüz Zəfərimizin, Böyük Qayıdışımızın üzərinə gölgə salmağa çalışmırlarmı? Məgər Əli, Gültəkin, Cəmil və onların muzdlu trolları, xaricdəki uzantıları Vətən müharibəsindən sonra “Xankəndi, Xocalı, Əsgəran nə oldu” demirdilərmi? Məgər onlar Fransa və digər erməni YANdaşlarının “humanitar” təxribatlarına dəstək vermirdilərmi? Azərbaycan Ordusu torpaqlarımızın xilası uğrunda ölüm-qalım savaşı verəndə bu adamların ətrafındakı Vətən və dövlət xainləri deyildilərmi “müharibə əleyhinə hərəkat” yaradıb, separatçılar və işğalçılarla birlikdə ortaq kağız parçasına imza atanlar? Guya bu adamlar separatizmin yuvası dağıldıqdan, suverenliyimiz bərpa olunduqdan və tarixi Zəfərimizin bütün dünyanı heyrətə gətirən akkordları vurulduqdan sonra “sülhməramlılar nə oldu” deyə bağırmırdılarmı? Suverenliyimiz bütün ərazilərimizdə bərpa olunduqdan, müqəddəs üçrəngli bayrağımız bütün yurd yerlərimizdə dalğalandıqdan, sülməramlılar son nəfərinədək ölkəmizi tərk etdikdən sonra isə azad edilmiş yurd yerlərimizin sürətlə bərpası və soydaşlarımızın qayıdışı dərd olub bunlara… Bu baxımdan, təəccüblənməyə dəyməz.
Əgər kimlərsə “Azərbaycan İsrailin Avroviziyada iştirak etməyəcəyi təqdirdə musabiqəyə qatılmayacaq” kimi qurşaqdan aşağı olduğu qədər də gülünc bir iddiaya inanıb ölkəmizə qarşı aparılan şər-şəbədə kampaniyasına qoşulacaqlarsa, qoy qoşulsunlar. Belələri ya satqındırlar, ya qərəzli, ya da beyinsiz. Satqınları cəzalandırmaq, qərəzliləri islah eləmək, beyinsizlərə isə mərhəmət göstərmək lazımdır…”
Mikayıl Mirzəzadə
