Ermənistanın Monumentwatch.org saytı Almaniyanın Nürnberq şəhərində keçirilən “Qərbi Azərbaycan əl işləri” mədəni layihəsi barədə dezinformasiya xarakterli məlumat dərc edib.
“Xəbərsiz” xəbər verir ki, həmin saytda irəli sürülüb ki, guya “Qərbi Azərbaycan əl işləri” layihəsi mədəni təşəbbüs deyil, Azərbaycanın tarixi yaddaşının yenidən yazılmasına və erməni mədəni irsinin inkarına yönəlmiş mədəniyyət siyasətinin davamıdır.
Erməni mediası qeyd edib ki, bu layihənin keçirilməsində məqsəd avropalıları Azərbaycanın zəngin mədəni irsi ilə tanış etmək olub.
Nəşr layihənin adının seçilməsində belə siyasi element olduğunu hesab edir:
“Layihənin adının tərtib edilməsinin özü də siyasidir. Azərbaycan dilində “Qərbi Azərbaycan” ifadəsi guya “tarixi Azərbaycan torpağı” sayılan Ermənistan ərazisini təmsil etmək üçün istifadə olunur. Ona görə də, bu layihə incəsənətin yayılmasından kənara çıxır: o, ərazi iddialarının ideoloji elementini özündə birləşdirir və Azərbaycan hakimiyyəti onun vasitəsilə yeni mədəni povest formalaşdırmağa çalışır. Layihənin Almaniyada Avropa auditoriyası qarşısında həyata keçirilməsi isə bu povesti xarici siyasət səviyyəsində gücləndirmək məqsədi daşıyır”.
Daha bir təxribatla çıxış edən media qurumu əlavə edib ki, Azərbaycan beynəlxalq ictimaiyyəti təqdim etdiyi tarixi hekayənin təbii və qanuni olduğuna inandırmağa çalışır.
“Burada mədəniyyət yumşaq güc kimi istifadə olunur. Azərbaycan beynəlxalq ictimaiyyətə təqdim etdiyi tarixi hekayənin təbii və qanuni olduğuna inandırmağa çalışır. Maraqlıdır ki, Azərbaycan tərəfi bu cür təşəbbüslər üçün İrəvanın sonuncu xanının varisi kimi təqdim etdikləri bir adamı dəvət edir: Əmir Əli Sərdari İrəvan. Onun tədbirlərdə iştirakı diqqəti tətbiqi sənətin təkcə bədii ifadə deyil, həm də milli yaddaşın və özünəməxsusluğun qorunub saxlanılması vasitəsi olması fikrinə yönəldir”.
Müəllif: İntiqam İsa
Mənbə: news.am xəbər portalı