Maliyyə naziri Sahil Babayev gələn il büdcədə neftin 1 barelinin qiymətinin 65 dollardan götürülməsinə aydınlıq gətirib.
“Xəbərsiz” xəbər verir ki, Milli Məclisin İqtisadi siyasət, sənaye və sahibkarlıq komitəsinin iclasında “Azərbaycan Respublikasının 2026-cı il dövlət büdcəsinin zərfi”nin müzakirəsi zamanı maliyyə naziri deyib ki, 22 beynəlxalq təşkilatın rəqəmlərindən ibarət hovuz var.
“Bunlar əsasında illik neft qiymətini müəyyən edirik. Bütün proqnozlarda 22 təşkilatın konsensus qiyməti 65 dollardır. Bizim qoyduğumuz çərçivə konsensus qiymətlərindən bir az yuxarıdır. Neft aşağı düşsə, nə olacaq? Bu il ərzində neft qiyməti dəfələrlə aşağı düşüb. Amma 9 aylıq neftin satış qiymətinə baxanda müxtəlif dövrlərdə aşağı düşmələrə baxmayaraq, qiymət 72 dolların üzərində olub”, – deyə nazir bildirib.
Sahil Babayev qeyd edib ki, Azərbaycanın neft gəliri olmasa, nə baş verəcəyi hər zaman sual olunur: “Bu gün qeyri-neft gəliri kəsrini 19%-ə endirə bilmişik. Bu çox yaxşı dinamikadır. 2029-cu ilə bu baza kəsrimizin ÜDM-ə nisbətini 13 %-ə gətirməyi planlaşdırırıq. Paralel olaraq, büdcənin sağlamlaşdırılması üçün atılan addımlarla qeyri-neft gəlirləri dövlət büdcəsi gəlirlərinin 57%-i olacaq. Bütün bunlar iqtisadiyyatın inkişafının ən gözəl göstəricisidir. Biz bu gün vergi yükünü ciddi artırmamışıq. Biz qeyri-neft sektoru üzrə vergi yükündə ciddi artım etməmişik. Ölkəmizin neft qaz gəlirlərindən asılılığını minimuma endirməliyik”.
