Azərbaycanda xüsusi karantin rejiminin 2026-cı il yanvarın 1-dək uzadılması səbəbindən quru sərhədləri hələ də bağlı qalır. Üstəlik, 8 avqustda Ermənistanla imzalanan sülh bəyannaməsi regionda təhlükəsizliyi və sabitliyi daha da gücləndirib. Bəs bütün bu dəyişikliklər fonunda yeni ildən etibarən quru sərhədləri açıla bilər?
Milli Məclisin deputatı Cavanşir Paşazadə Metbuat.az-a açıqlamasında quru yolu ilə gediş-gəlişi bağlı saxlayan amillərdən danışıb:
“İllərdir quru sərhədlərimiz bağlıdır və təbii ki, 44 günlük müharibədən sonra da bu günə qədər vəziyyət dəyişməyib. Bölgədə sabitliyin tam olmaması, Ermənistan və Azərbaycan arasında sülhün hələ də tam şəkildə bərpa olunmaması, eləcə də Zəngəzur yolunun açılmaması bu məsələyə təsir göstərən əsas amillərdir. Təbii ki, insanlarımızın daha rahat hərəkət edə bilməsi vacibdir. Qonşu ölkələrdə, xüsusən Gürcüstanda yaşayan soydaşlarımızın gediş-gəlişi, onların qohumluq münasibətləri, həmçinin digər ölkələrlə əlaqələrimiz və turizm axını iqtisadiyyatımıza da müsbət təsir göstərir. İnsanların sərbəst gediş-gəlişi həm iqtisadiyyatın güclənməsinə, həm də sosial əlaqələrin genişlənməsinə səbəb olur”.
C.Paşazadənin sözlərinə görə, quru sərhədləri gələn ildən açıla bilər:
“Mən hesab edirəm ki, növbəti ildən bu istiqamətdə irəliləyiş olacaq, regionda sabitlik yaranacaq və insanlarımız sərbəst şəkildə gediş-gəlişi həyata keçirə biləcəklər. Əminəm ki, 2026-cı il bizim üçün uğurlu olacaq, həm Zəngəzur yolunun açılması, həm bölgədə logistikanın inkişafı, həm də quru yollarının açılması həyata keçiriləcək. Mən də bunu arzulayıram. Ermənistanda seçkilər başa çatdıqdan və sülh müqaviləsi tam şəkildə icra olunduqdan, digər siyasi məsələlər dövlətimizin müəyyən etdiyi çərçivədə həll edildikdən sonra quru sərhədlərimizin tam açılması mümkün olacaq”.
