Yəmənin üsyançı Ənsar Allah hərəkatı ölkə ərazisinin təxminən üçdə birinə nəzarət edir.
“Xəbərsiz” bildirir ki, bunu BMT-nin sözçüsü Stefan Dujarrik deyib.
Onun sözlərinə görə, Husilər Birləşmiş Millətlər Təşkilatının daha 9 əməkdaşını saxlayıb və bununla da qlobal qurumun husilər tərəfindən özbaşına saxlanılan işçilərinin ümumi sayı 53-ə çatıb.
BMT-nin mətbuat xidmətinin yaydığı bəyanatda deyilir: “Ən son olaraq, de-fakto Husilər BMT-nin əlavə doqquz əməkdaşını saxlayıb, bununla da 2021-ci ildən bəri özbaşına həbs edilmiş BMT əməkdaşlarının ümumi sayı 53-ə çatıb”.
Dujarrik bildirib ki, BMT rəhbəri qlobal təşkilatın bütün işçilərinin dərhal və qeyd-şərtsiz azad edilməsinə çağırdığı üçün bu hərəkətləri qəti şəkildə pisləyir.
Qeyd edək ki, Yəməndə 2014-cü ilin avqustundan hökumət qüvvələri ilə husi tərəfdarları arasında qarşıdurma davam edir. O, ən kəskin mərhələyə 2015-ci ilin martında Səudiyyə Ərəbistanının başçılıq etdiyi koalisiyanın münaqişəyə qoşulması ilə çatmışdı. Yəməndəki vətəndaş müharibəsi misli görünməmiş humanitar fəlakətə səbəb olub, BMT-nin məlumatına görə, 24 milyondan çox yəmənli və ya ölkə əhalisinin 80%-i humanitar yardıma ehtiyac duyur, məcburi köçkünlərin sayı isə 4 milyonu keçib.
Əli Hacı