Polşanın İran siyasətinə qarşı tənqidi münasibətinin arxasında İranın regiondakı fəaliyyəti dayanır.
Bu sözləri siyasi şərhçi Çingiz Şahbazi “Xəbərsiz”ə açıqlamasında deyib.
Onun sözlərinə görə, İran Polşanın sərhədlərini tez-tez pozan Rusiyaya dron texnalogiyalarının verilməsində və digər silah-sursatla təmin edilməsində günahlandırılır. Çünki bu təminat Polşanın haqlı narahatlığını ifadə etməklə yanaşı, həmçinin Polşa xarici işlər nazirinin xarakterizə etdiyi kimi, İranı, ölüm və dağıntı göndərən ölkə olaraq göstərməsinə səbəb olub.
“Rusiyanın Polşaya dron hücumları təşkil etməsindən sonra, Polşa rəsmilərinin İranı terrorçu dövlət olaraq göstərmələri artıq adi hala çevrilib. Bu tənqidlər İranda diplomatik etiraza səbəb olub və İranın Xarici İşlər Nazirliyi Polşanın səfirini çağıraraq, bəyanatları qərəzli və əsassız adlandırıb. Məlumdur ki, Ukrayna müharibəsində, İran istehsalı olan “Shahed -136″ dronları, Rusiya tərəfindən istifadə olunmaqdadır. Polşa həmçinin NATO və Avropa İttifaqı ölkəsi olaraq Rusiya və Ukrayna arasında davam edən müharibədə öz mövqeyini və siyasətini yürüdür”, – deyə Çingiz Şahbazi əlavə edib.
O, qeyd edib ki, bu baxımdan Rusiyanın yanında duran ölkələrin və bu istiqamətdə yardımçı olan dövlətlərə qarşı barışmaz mövqeyi ilə münaqişə dövründə daha çox aktivlik göstərən Avropa ölkələrdən biri olaraq tanınıb. İranın Rusiyaya, Ukraynaya qarşı istifadə etmək üçün tədarük etdiyi raket və dronlardan dolayı tənqid olunması Polşa tərəfindən dəfələrlə müşahidə olunub və Polşanın diplomatik bəyanatlarında yer alması birinci dəfə deyil.
“Bu baxımdan regionda konfliktlərin çoxalması heç də yaxşı hal olaraq görülmür və Qərb üçün əlavə təhlükə mənbəyi olaraq qəbul edilməkdədir. Çünki, əlavə olaraq konfliktlərin böyüməsi, ölkələrarası hava məkanlarından istifadəyə öz təsirini göstərir və nəqliyyat -logistika ilə bağlı problemlərin çoxalması və məhdudiyyətlər meydana çıxır və sanksiyaların dərinləşdirilməsinə səbəb olur. Bütün bunlar regional sabitlik və təhlükəsizlik baxımından ciddi problemləri özü ilə gətirən amillərdir”, – deyə o, fikirlərini davam etdirib.
Ekspertin fikrincə, bu kimi konfliktlərin böyüməsi heç şübhəsiz ki, regionda investisiya layihələrinin gerçəkləşdirilməsi və əməkdaşlıq əlaqələrinin inkişafı istiqamətində də ciddi şəkildə maneələr yaradır və qlobal miqyasda olan konfliktlərin region ölkələrinə olan təsirini artırmaqla nəticələnir. Bu baxımdan konfliktin daha da böyüməsinə səbəb ola biləcək amillər və təhlükələr üzərində nəzarətin geniş şəkildə müzakirə olunması lazımdır. Bunun üçün əlbətdə ki, region ölkələrinin də bu istiqamətdə səyi və görüşləri öz sözünü deməlidir.
Ziyafət Əlisoy
