Azərbaycanda gələn ildən etibarən “Buy Now, Pay Later” (İndi al, sonra ödə) xidmətinin istifadəyə verilməsi mümkün ola bilər.
Məlumata görə, ölkəmizdə fintex sahəsinin inkişafına dair təkliflər müntəzəm qaydada Mərkəzi Banka göndərilir və tənzimləyici orqan sektorla sıx əməkdaşlıq edir.
Hazırda fintex şirkətləri üçün ən perspektivli sahələrdən biri “Buy Now, Pay Later” (İndi al, sonra ödə) modelinin tətbiqidir.
Mərkəzləşdirilmiş Kredit Reyestri (MKR), “mygov”, İAMAS (idarələrarası avtomatlaşdırılmış məlumat-axtarış sistemi) və sair elektron platformalarla inteqrasiyalar tam şəkildə qurulduqdan sonra fintex şirkətləri yerində mikrokreditlərin təqdim edilməsi və “İndi al, sonra ödə” modellərinin işə salınmasına başlaya biləcəklər. Bu da banklarla müqayisədə əlavə rəqabət üstünlüyü təmin edə bilər.
Eyni zamanda, “InsurTech” məhsullarının, yəni sığorta və fintex xidmətlərinin birlikdə təklif olunması da bazarın genişlənməsinə dəstək verə bilər.
Bəs, “indi al, sonra ödə” modeli nədir?
Mövzu ilə bağlı Bizim.Media-ya danışan iqtisadçı Əkrəm Həsənov deyir ki, bəzi insanların pulu olmasa da, nəsə almaq istəyirlər:
“Banklar və bank olmayan təşkilatlar da insanların bu ehtiyacından pul qazanırlar. İndi isə fintex xidmətləri gəlir. Nəzərə alaq ki, bu məsələdə fintex şirkətləri banklardan və digər kredit təşkilatlarından daha çevik ola bilər. Məsələn, siz harasa gedirsiniz və nəsə almaq zərurəti yaranır, amma pulunuz yoxdur. Bu anda fintex xidməti sizi vəziyyətdən çıxara bilir.
Lakin bunun üçün ilk növbədə kredit almaq istəyən şəxsin kredit tarixçəsi müsbət olmalıdır. Əks təqdirdə onun müraciəti müsbət cavablandırılmayacaq. Amma bütün hallarda fintex xidmətinin ölkəmizə gəlməsi müsbət haldır”.
