Daxili İşlər Nazirliyinin yerli qurumlarının təşkilatçılığı ilə Lerik və Qusar rayonlarında məktəblilərlə maarifləndirici görüşlər keçirilib.
Lerikdə görüş – Günəşli kənd tam orta məktəbində təşkil olunan tədbirdə çıxış edən Lerik RPŞ-nin rəis müavini, polis polkovnik-leytenantı Anar Şıxəliyev narkomaniyanın müasir dövrdə bəşəriyyət üçün böyük təhlükə olduğunu vurğulayıb, sağlam gəncliyin formalaşdırılmasının vacibliyindən danışıb.
O, narkotik vasitələrin qanunsuz dövriyyəsinə qarşı görülən qətiyyətli tədbirlər barədə şagirdləri məlumatlandırıb. Həmçinin kibercinayətkarlıq hallarına qarşı ehtiyatlı davranış qaydaları diqqətə çatdırılıb. Tədbirdə şagirdlərə Polis Akademiyasına qəbul qaydaları və daxili işlər orqanlarında xidmət imkanları barədə də ətraflı məlumat verilib.
Qusarda görüş – Rayonun 1 saylı tam orta məktəbində keçirilən tədbirdə isə RPŞ-nin rəisinin xidmət üzrə müavini, polis polkovnik-leytenantı Emin Kərimov “Narkomaniyaya yox deyək” mövzusunda çıxış edərək, narkotiklərin insan həyatı və cəmiyyət üçün yaratdığı fəsadlardan danışıb.
Polis əməkdaşları məktəblilərə Polis Akademiyasının tarixi, inkişafı və hüquq elminin inkişafına verdiyi töhfələri barədə məlumat veriblər. Çıxışlar zamanı həmçinin erkən nikahın fəsadları mövzusuna da toxunulub.
Hər iki rayonda keçirilən görüşlərin sonunda şagirdlərin çoxsaylı sualları cavablandırılıb, onlara faydalı tövsiyələr verilib.
