Əhalinin dərman təminatını yaxşılaşdırmaq və tibbi sığorta sisteminin maliyyə dayanıqlığını artırmaq məqsədilə Nazirlər Kabineti tərəfindən yeni qaydalar təsdiqlənib. Qaydalar dərmanların Xidmətlər Zərfinə daxil edilməsi və çıxarılması meyarlarını əhatə edir.
“Xəbərsiz” xəbər verir ki, bunu İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentinin rəhbəri Aynurə Əhmədova Gəncə şəhərində keçirilən media-tur və təlim zamanı bildirib. Onun sözlərinə görə, verilən qərarlar həm sistemin idarə olunmasını, həm də vətəndaşların dərmanlara çıxış imkanlarını daha da yaxşılaşdırır. “Dərman təminatı ilə bağlı ən vacib yeniliklərdən biri də “Pozitiv siyahı”nın formalaşdırılmasıdır. Pozitiv siyahı icbari tibbi sığorta hesabına ödəniləcək dərmanların rəsmi siyahısıdır və onun ilkin mərhələsi artıq hazırlanıb. Siyahıya daxil edilən dərmanlarla bağlı bütün məlumatlar, təsiredici maddə, dozalar, kompensasiya faizləri rəsmi saytımızda dərc olunacaq”.
O əlavə edib ki, ilk etapda siyahıya ürək-damar xəstəliklərinin müalicəsində istifadə olunan qan təzyiqini salan dərmanlar daxil edilib. Bu dərmanların dəyərinin tam şəkildə və ya müəyyən hissəsinin sığorta fondu tərəfindən qarşılanması nəzərdə tutulur. Aynurə Əhmədova bildirib ki, dərmanların siyahıya daxil edilməsi üçün onlar dövlət reyestrində qeydiyyatdan keçməli, keyfiyyət, təhlükəsizlik və effektivlik tələblərinə cavab verməli, qiyməti dövlət tərəfindən tənzimlənməli və sığorta fondunun maliyyə imkanlarına uyğun olmalıdır.
Dərmanların təyinatı üçün əsas mexanizm elektron resept sistemi olacaq. Elektron reseptlərin İcbari Tibbi Sığorta üzrə Dövlət Agentliyinin məlumat bazası ilə inteqrasiyası üzrə texniki işlər artıq aparılır. Sığorta hesabına verilən dərmanlar yalnız Agentliklə müqavilə bağlayan özəl apteklərdə təqdim olunacaq və bu apteklər xüsusi loqolarla işarələnəcək ki, vətəndaşlar rahatlıqla tanıya bilsinlər” – deyə Aynurə Əhmədova bildirib.
