İctimai nəqliyyatda gedişhaqqı ilə bağlı qiymət dəyişimində qərara diqqət yetirdikdə görürük ki, burada bu dəyişiklik tələblərə cavab verməyən ictimai nəqliyyatda çalışan avtobuslara şamil edilmir.
Bu sözləri “Xəbərsiz”ə açıqlamasında nəqliyyat eksperti Eldəniz Cəfərov deyib.
Ekspert bildirir ki, müvafiq qrumlar ictimai nəqliyyatda, xüsusən də Bakı və ətraf ərazilərdə tam təhlükəsiz, keyfiyyətli, bugünki dünya standartlarına və müasir sərnişindaşıma tələblərinə cavab verən avtobusların olmasına çalışırlar:
“Bununla da, marşrutda hələ də köhnə və yararsız avtobusları olan şirkətlərə siqnal verilir ki, siz də parkınızı yeniləyin”.
“Qiymət dəyişikliyi gözlənilən idi. Daşıyıcı şirkətlər illərdir ki, onlara bu qiymətdə sərnişin daşımaq sərf etmədiyini, müəyyən xərclərin ödənilmədiyini qeyd edirlər. Bu, həm də onlara da bir dəstəkdir. Bu qiymət dəyişikliyi daşıyıcı şirkətlərin qarşısında böyük bir məsuliyyət yaradır ki, onun müqabilində təhlükəsiz və keyfiyyətli daşınmanı təşkil etməlidirlər”.
Qeyd edək ki, İctimai nəqliyyatda daha keyfiyyətli xidmətin göstərilməsinə zərurət yarandığı bir dövrdə sərnişindaşıma xidmətinin davamlılığını təmin etmək və dövlət proqramında qarşıya qoyulan hədəflərə nail olmaq məqsədilə tariflərin tənzimlənməsi ilə bağlı müvafiq qərar qəbul edilib və yeni tariflər təsdiqlənib:
– Metro nəqliyyatında sərnişindaşıma xidmətinin tarifi bir gediş üzrə 60 qəpik;
– Müasir tələblərə cavab verən və yalnız nağdsız ödəniş alətləri vasitəsilə fəaliyyət göstərən müntəzəm şəhərdaxili (rayondaxili), qəsəbələrarası və şəhərətrafı avtobus marşrutlarında sərnişindaşıma xidmətlərinin tariflərinin aşağı həddi (məsafədən asılı olaraq tariflər dəyişir) 60 qəpik;
Bu tariflər oktyabrın 1-dən qüvvəyə minəcək.
Yeni tariflər Bakı şəhərinin inzibati ərazisi daxilində şəhərdaxili, şəhərətrafı və qəsəbələrarası avtobus marşrutlarında gediş haqları yalnız nağdsız ödəniş alətləri vasitəsilə həyata keçirilən, habelə elektriklə və ya sıxılmış təbii qazla (CNG) işləyən avtobuslara şamil ediləcək.
Bu dəyişiklik ilkin mərhələdə paytaxtın sözügedən tələblərə cavab verən mövcud marşrut şəbəkəsinin təxminən 30%-ni əhatə edəcək. Tələblərə cavab verməyən marşrutlarda isə qiymət dəyişikliyi tətbiq olunmayacaq.
Eyni zamanda tarif dəyişikliyi Bakı-Sumqayıt, Bakı-Abşeron, Sumqayıt-Abşeron arasında və digər şəhər və rayonlarda fəaliyyət göstərən müntəzəm avtobus marşrutlarında da tətbiq olunacaq. Bu dəyişiklik gediş haqları yalnız nağdsız ödəniş aləti vasitəsilə həyata keçirilən, elektrik, CNG və ya 1 yanvar 2025-ci ildən sonra istehsal edilən dizel yanacağı ilə işləyən avtobuslara şamil ediləcək.
Tarif dəyişikliyi daşıyıcıların maliyyə dayanıqlığının artmasına, avtobus parkının yenilənməsinin sürətlənməsinə (növbəti illər ərzində hər il təxminən 400 ədəd yeni avtobusun alınması və daşımalara cəlb edilməsi gözlənilir), əhali üçün ödəniş rahatlığının təmin edilməsinə, ekoloji təmiz avtobusların istifadəsinin təşviqinə və sərnişindaşımada şəffaflığının artmasına müsbət təsir göstərəcək.
Əlavə olaraq, daşıyıcıların nağdsız ödəniş sistemlərinə keçid etməsi stimullaşdırılacaq və bunun bazasında sərnişindaşımada diferensial tariflərin tətbiq edilməsi üçün texniki imkanların formalaşdırılmasına şərait yaradılacaq.
Ziyafət Əlisoy