Qızılın qiymətinin artmasının səbəbi dünyadakı geosiyasi və geoiqtisadi vəziyyətin gərginləşməsidir.
Bu sözləri iqtisadçı ekspert Natiq Cəfərli “Xəbərsiz”ə qızılın qiymətinin bahalaşması ilə bağlı xəbəri şərh edərkən deyib.
Ekspert bildirir ki, Rusiya və ABŞ arasında yenidən gərginlik yaranıb. “Müharibə”nin uzanması təhlükəsi var. Həmçinin də ticarət müharibələri qızışıb:
“ABŞ-nin Çinə qarşı tarif təhdidi var. Hindistana qarşı 50% tariflər tətbiq olunur. Belə bir qarışıq zamanda dünya ölkələri, Mərkəzi banklar, yatırımçılar güvənli liman rolunda çıxış edən qızıla daha çox yatırım edirlər. Ona görə də qızılın qiyməti qalxır”.
“Azərbaycanda da qızılın qiyməti dünya bazarı ilə müəyyənləşir. Dünya bazarında qızılın qiyməti qalxan kimi Azərbaycan bazarında da ciddi bahalaşma müşahidə olunur”, – deyə Natiq Cəfərli əlavə edib.
Ziyafət Əlisoy