Qeyri-sabit hava şəraiti hər zaman bir çox xəstəliyə “dəvətnamədir”.
Bu sözləri “Xəbərsiz”ə açıqlamasında terapevt Günay Lətifova deyib.
O, bildirib ki, biz proflaktik olaraq özümüzü qorumaq məqsədi ilə geyim tarazlığı mütləq şəkildə gözləməliyik. Bəzi günlərdə havanın isti olmasına aldanmayıb, gecənin soyuq havasını da nəzərə almaq lazımdır.
Terapevtin sözlərinə görə, sağlam qidalanma vacib ünsürlər sırasındadır.
“Əgər siz hansısa narahatçılıqla üzləşmisinizsə, həkim göstərişi ilə hər hansı dərman preparatını qəbul etməlisiniz. Çalışmalıyıq ki, təbii məhsullardan istifadə edək. Çox təəssüf ki, bəzən ağırlaşma halları da baş verir. Bu hallar yaşandıqda isə həkim təyinatı olmadan sistem qoşmaq, hər hansı dərman vasitəsindən istifadə etmək qətiyyən yolverilməzdir. Çünki siz virusa yoluxduğunuzu, yoxsa bakteriya ilə mübarizə apardığınızı bilmirsiniz. Bu halda dərman preparatlarını qarışdırsanız, əks təsir göstərib, başqa xəstəlikləri törədə bilər”, – deyə o, əlavə edib.
Ziyafət Əlisoy
