“Bank BTB” ASC bu ilin yanvar-sentyabr aylarını 641 min manat zərərlə başa vurub.
“Xəbərsiz” “Report”a istinadən xəbər verir ki, bu barədə bankın maliyyə hesabatlarında qeyd olunub. Məlum olub ki, bu zərər ötən ilin eyni dövrünə nisbətən 30 % çoxdur.
9 ay ərzində “Bank BTB”nın əməliyyat gəlirləri 30,12 milyon manat (illik müqayisədə 9,3 % çox), əməliyyat xərcləri 25,724 milyon manat (8,4 % çox), xüsusi ehtiyatlara ayırmaları 2,205 milyon manat (4,9 dəfə çox), gözlənilməz xərcləri isə 2,831 milyon manat (27 % az) təşkil edib.
Bu il oktyabrn 1-nə “Bank BTB”nin aktivləri 389,268 milyon manat olub ki, bu da 1 il əvvələ nisbətən 5,7 % çoxdur. Bunun 276,304 milyon manatı müştərilərə verilmiş xalis kreditlərdir. Son 1 ildə Bankın kredit portfeli 0,4 % böyüyüb.
Hesabat dövründə “Bank BTB”nin öhdəlikləri 7 % artaraq 338,413 milyon manat, o cümlədən depozit portfeli 11,9 % artaraq 167,873 milyon manat, balans kapitalı isə 2,2 % azalaraq 50,855 milyon manat olub.
Xatırladaq ki, “Bank BTB” 2010-cu ildə yaradılıb. Onun nizamnamə kapitalı 71,45 milyon manatdır. Bankın səhmlərinin 76,74 %-i Nigar Mehdiyevaya, 17,68 %-i Rza Sadiqə (Müşahidə Şurasının sədri), 5,58 %-i isə Tükəzban Mahmudovaya məxsusdur.
Qeyd edək ki, Nigar Mehdiyeva ötən gün cinayət məsuliyyətinə cəlb olunan Prezident Administrasiyasının sabiq rəhbəri Ramiz Mehdiyevin gəlinidir.