Rusiya öz neftinin bir hissəsini artıq Gürcüstanda emal etməyə başlayır.
“Xəbərsiz” xəbər verir ki, bu barədə “Reuters“ məlumat verib.
Agentliyin yaydığı məlumata görə, Rusiyanın “Rusneft” şirkəti ilk dəfə olaraq xam neftini Gürcüstanın Kulevi limanına göndərib. Siberian Light markalı 105 min ton neft Novorossiysk limanından Kuleviyə çatdırılıb.
Yeni inşa edilən Kulevi Neft Emalı Zavodu illik 1,2 milyon ton, yəni gündəlik təxminən 24 min barel neft emal etmək gücünə malikdir. Bu da Rusiyanın sanksiyalar səbəbilə daxili emal gücündə itkiləri kompensasiya etmək üçün regionda yeni alternativlər axtardığını göstərir.
Qeyd edək ki, Ukraynanın Rusiya neft infrastrukturuna endirdiyi hava zərbələri nəticəsində, Beynəlxalq Enerji Agentliyinin hesablamalarına görə, Rusiyanın neft emalı həcmi gündəlik 500 min barel azalıb. Gürcüstandakı bu yeni zavod, Kreml üçün alternativ emal məkanı rolunu oynaya bilər.