Sənət qalası, yoxsa bayağılığın səhnəsi? - OPERA STUDİYASI BU GÜN... - VİDEO
Bilirəm, Azərbaycan musiqisinə, Azərbaycan mədəniyyətinə hörməti olan heç bir şəxs bu “konsertə” ciddi iş kimi yanaşmır. Əksinə, sənətçilərimiz ürək ağrısı ilə imdad edirlər…
Bugünkü reallıq Azərbaycan mədəniyyətinin önəmli musiqi səhnələrindən biri olan Opera studiyasında bayağı ifaçıların səhnə aldıqlarını əks etdirsə də, tamam başqa bir reallıqda bu tip ifaçıların hansı səviyyədə olduqlarını, layiq olduqları yerləri aşkar nümayiş etdirir.
Məsələn, bir vaxtlar televiziyalarda at oynadan, teleməkanı əsir alıb, hətta bəzən efirə çıxmaq üçün müəyyən şərtlər qoyan, sönən ulduzlar – Vəfalar, Şəbnəmlər, Nəfəslər niyə yoxdurlar? Nə oldu? Nə dəyişdi? Axı onlar bizə sənətkar, ulduz, flaqman kimi təqdim olunurdular… Bəs indi haradadırlar?!
Deməli, haqq-ədalət öz yerini mütləq tapacaqmış. Sadəcə səbr etmək lazım imiş…
Lakin səbr edib Vəfa Şərifova və onun sırasından olan müğənnilərin Opera studiyası kimi vacib bir səhnədə konsert verməyinə də göz yummaq olmaz.
Axı o studiyanın əsasını qoyanlardan biri məhz Üzeyir Hacıbəyli olub… Axı o studiyada müxtəlif zamanlarda Bülbül, Rəşid Behbudov, Niyazi, Fidan Qasımova, Xuraman Qasımova, Lütfiyar İmanov, Müslüm Maqomayev kimi dahilər, şedevrlər səhnə alıblar… Axı ora Bakı Musiqi Akademiyasının nəzdində fəaliyyət göstərir… Axı ora Azərbaycan musiqisinin təməl daşını qoyanların yadigarıdır…
Niyə bütün mədəniyyətimizi maddiyyata qurban vermişik? Məsələnin kommersiya tərəfini istisna etmirik. Və bu da reallıqdır ki, bu gün Vəfa Şərifovanın o zalın ödənişini edib, konsert vermək üçün yetəri qədər maliyyəsi var. Qazancı daha artıq olsun! Bəs musiqimizin qazancı? Bəs bizim vicdanımız?
Musiqinin keşiyində duranlar, televiziyalarda bar-bar bağırıb “Azərbaycan musiqisi müqəddəsdir” deyənlər niyə susublar? Niyə Üzeyir Hacıbəyliyə, Rəşid Behbudova, Müslüm Maqomayeva – Konservatoriyaya, Opera studiyasına endirilən zərbələrə göz yumurlar? Sizidəmi pulla susdurublar? Hara baxır musiqiçilərimiz? Nə işlə məşğuldur Konservatoriyanın aidiyyatı şəxsləri? Məgər öyrətməklə hər şey bitirmi? Bəs qorumaq?
Niyə qorumursunuz? Qoruya bilmirsinizsə, gedin! Oxumayın, öyrətməyin! Hər şey göz önündədir. Kimin nə olduğu, nə etdiyi bilinir. Məlumdur kimin kimə havadarlıq etdiyi. Xalqa göstərilib pula əyilənlər.
Sənətkar olmaq həm də qorumaqdır – ona miras qoyulanları, xalqın sərvətini, millətin mədəniyyətini. Pula satmaq deyil musiqini, sənəti, ən əsası da vicdanı…
Niyə satırsınız? Niyə susursunuz? Kim icazə verib o xanıma? Niyə müqəddəs məkanları çirkləndirirsiniz?
O səhnədə çıxış edən ilk bayağı, qeyri-peşəkar Vəfa Şərifova olsa, qəlbimiz bu qədər yanmazdı. Ötən günlərdə meyxanaçı, bayağı ifaçıların “bəstəkarı”, söz yazarı, “musiqi dühası” İfrat da orada konsert verib. Adamın dili, ağzı quruyur. Nə demək, necə demək lazım olduğunu bilmirsən.
Axı dərdimizi kimə danışaq? Kiminlə məsləhətləşək? Kimdən soruşaq ki, bunlar niyə orada çıxış edirlər? Niyə o səhnənin adı ucuzlaşdırılır?
Konsert vermək ayrılıqda təqdirəlayiq addımdır. Bu, inkişaf etmək arzusundan doğan bir ideyadır. Amma hər kəsin layiq olduğu bir yer var. Necə ki, siz televiziyalara layiq deyilsiniz, eyni ilə də o səhnələr sizin üçün deyil! Ora toxunmaq, o səhnəyə ayaq basmaq olmaz!
Sizin kimi ifaçılara da konsert proqramı ilə çıxış etmək üçün yetəri qədər məkan var. Narahat olmayın. Məsələn, restoranlar, şadlıq evləri, çayxanalar, kafelər, kabinetlər və s.
Sizin repertuarınız ora üçün nəzərdə tutulub. Kimisə alçaltmaq kimi məramımız yoxdur. Lakin sizə repertuarınızı xatırladır, yerinizi göstəririk.
Layiq olduğunuzdan artığına əl uzatmayın! Siz Azərbaycan musiqisi, Azərbaycan mədəniyyəti üçün yaxşı mənada heç nə etməmisiniz. Əlinizə fürsət düşən kimi ya qeyri-peşəkar musiqiləri təbliğ edib, pul qazanmısınız, ya da mədəniyyətsizliyin təbliğatçısı olmusunuz.
Ziyafət Əlisoy
