Rəqəmsal İnkişaf və Nəqliyyat Nazirliyi, Medianın İnkişafı Agentliyi və AZCON Holding şirkətlərindən olan Milli Süni İntellekt Mərkəzinin birgə təşkilatçılığı ilə media nümayəndələri üçün “Süni intellekt standartlarının media kommunikasiyası” mövzusunda təqdimat keçirilib.
“Xəbərsiz” xəbər verir ki, tədbirin əsas məqsədi süni intellekt sahəsində qəbul edilən dövlət standartları barədə media nümayəndələrini məlumatlandırmaq, sözügedən sahədə düzgün, dəqiq və məsuliyyətli ictimai kommunikasiya mühitinin formalaşdırılmasına dəstək göstərmək olub.
Görüş zamanı media nümayəndələrinə süni intellekt üzrə mövcud normativ baza, standartlaşdırma proseslərinin mahiyyəti və bu proseslərin dövlət, biznes, cəmiyyət üçün əhəmiyyəti barədə ətraflı məlumat verilib.
Tədbir çərçivəsində Azərbaycanda indiyədək qəbul edilmiş 8 süni intellekt dövlət standartı barədə geniş təqdimat nümayiş etdirilərək qeyd olunub ki, sözügedən standartlar süni intellekt sistemlərində terminologiyanın vahidləşdirilməsi, risklərin idarəolunması, idarəetmə və etibarlılıq mexanizmlərinin təkmilləşdirilməsi kimi mühüm istiqamətləri əhatə edir. Bu standartlar ölkədə süni intellekt ekosisteminin düzgün, təhlükəsiz və beynəlxalq tələblərə uyğun şəkildə formalaşdırılması üçün əsas baza rolunu oynayır.
Təqdimat zamanı sahə üzrə müxtəlif dövlət və ictimai qurumları özündə birləşdirən informasiya-kommunikasiya texnologiyalarının standartlaşdırılması üzrə Texniki Komitənin fəaliyyətindən bəhs edilib. Bildirilib ki, süni intellekt üzrə dövlət standartlarının hazırlanması və uyğunlaşdırılması prosesi Texniki Komitənin koordinatorluğu ilə həyata keçirilir və Komitə beynəlxalq texniki qurumlarla əməkdaşlıq etməklə Azərbaycan üçün zəruri olan Sİ standartlarının seçilməsi, işlənməsi və təsdiqinin təmin edilməsində mühüm rol oynayır. Bu əməkdaşlıq ölkənin süni intellekt sahəsində qlobal standartlaşdırma təşəbbüslərinə inteqrasiyasını gücləndirir.
Vurğulanıb ki, süni intellekt ekosisteminin sağlam və etibarlı şəkildə inkişaf etdirilməsi üçün standartların tətbiqi xüsusi əhəmiyyət daşıyır. Sözügedən standartlar informasiya dəqiqliyinin təmin edilməsinə, yanlış və qeyri-dəqiq məlumatların qarşısının alınmasına, süni intellekt sistemlərində şəffaflıq və etimadın artırılmasına, risklərin düzgün idarə edilməsinə və innovativ texnologiyaların təhlükəsiz tətbiqinə xidmət edir.
