Xəbər verdiyimiz kimi, Almaniyanın Xarici İşlər Naziri Yohan Vadefül Rusiya-Ukrayna savaşının bu qış sona çatacağını bildirib.
O, əlavə edib ki, bu qış Kiyev üçün həlledici rol oynayacaq.
Vadefül qeyd edib ki, Ukraynanın Qərbin əlavə yardımı olmadan özünü müdafiə etmək qabiliyyətini itirəcək.
Onun sözlərinə görə, Almaniya bununla bağlı xüsusi məsuliyyət daşıyır və Berlin istənilən vaxt Kiyevi dəstəkləməyə hazırdır.
Almaniya Xarici İşlər Nazirinin fikirlərini “Xəbərsiz”ə şərh edən “Müasir İnkişaf” İctimai Birliyinin sədri, siyasi şərhçi Mübariz Göyüşlü bildirir ki, Rusiya-Ukrayna tərəflərinin hazırkı tutumu göstərir ki, onlar müharibəni sonlandırmağa hazır deyillər.
“Nə Rusiya, nə də Ukrayna hər hansı güzəşti edir. Əlbəttə ki, burada haqlı tərəf Ukrayna tərəfidir. Onların torpaqları işğal olunub. Ukrayna artıq nəsə istəmir. Onlar Rusiyanın işğal olunmuş ərazilərdən çıxmasını istəyirlər. Amma Rusiya bu tələbə əməl etmir, Ukrayna isə tələbindən geri çəkilmir. Nəticədə sülh alınmır”, – deyə o, əlavə edib.
Siyasi şərhçinin sözlərinə görə, proses bir müddət də belə davam edəcək. Tərəflərin öz iddialarından geri çəkiləcəyi gözlənilmir. Bu barədə hər hansı bir işartı da yoxdur. Hər iki tərəf haqlı olduğunu deyir və güzəşt etməyi planlamır.
Ziyafət Əlisoy
