Gəncə Şəhər Birləşmiş Xəsəxanasının nəzdində olan Abbas Səhhət adına xəstəxanadan şikayət var.
“Xəbərsiz” bildirir ki, sosial mediada video paylaşan vətəndaşlar xəstəxanada olan sıxlıqdan şikayətləniblər.
Onlar növbənin çox gec çatdığını deyərək, öz etirazlarını bildiriblər.
Mövzu ilə bağlı TƏBİB-dən “Xəbərsiz”ə bildirildi ki, Gəncə Şəhər Birləşmiş Xəsəxanasının nəzdində olan Abbas Səhhət adına xəstəxanaya gündəlik müraciət sayı orta hesabla 1 800-2 000 nəfər təşkil edir.
“Müraciət edən hər bir vətəndaşa isə gündəlik təxminən 2-3 adda müxtəlif tibbi xidmətin göstərilməsinə ehtiyac yaranır. Son günlər müraciətlərin sayında artım müşahidə olunur. Yaranan vəziyyətin tənzimlənməsi məqsədilə tibb müəssisəsi tərəfindən zəruri addımlar atılır. Hazırda müraciət sayının artmasını nəzərə alaraq vətəndaş axınına uyğun olaraq həkim və orta tibb personalının iş qrafikləri yenidən tənzimlənib”, – deyə TƏBİB-dən bildirildi.
Əlavə olunub ki, xidmətlərin keyfiyyətinin artırılması və növbə yükünün azaldılması məqsədilə gələcəkdə müraciətlərin əvvəlcədən planlaşdırılması imkanlarının yaradılması istiqamətində müvafiq işlər nəzərdə tutulub.
Ziyafət Əlisoy
@xebersiz.az Vətəndaşlar “Gəncə Birləşmiş Xəstəxanası”ndan şikayəyçidir: “Növbəmiz çatmır”