“ABŞ Prezidenti Donald Tramp və Rusiya Prezidenti Vladimir Putin arasında telefon danışığı oldu və bu görüşdən sonra ABŞ və Rusiya liderləri arasında Budapeştdə yenidən görüşmək qərarı alındığı bildirilir”.
Bu sözləri “Xəbərsiz”ə açıqlamasında siyasi şərhçi Çingiz Şahbazi deyib.
Politoloq əlavə edib ki, iki lider arasında telefon görüşünün ardınca Rusiya Prezidentinin ölkəsinin Təhlükəsizlik Şurasının toplantısını çağırması diqqət çəkən məqamlardandır. Amma, Rusiya rəsmilərinin verdiyi məlumata görə, Prezident Putin Təhlükəsizlik Şurası üzvlərinə telefon görüşünün məzmunu haqqında geniş şəkildə izah verib.
“Əslində təhlükəsizlik şurasının iclasının keçirilməsi normal haldır. Bu müharibə aparan dövlət üçün xüsusi əhəmiyyət daşıyır və Putinin, ölkənin Təhlükəsizlik Şurası üzvlərini toplaması, heç şübhəsiz ki, yürüdülən siyasətin prioritet istiqamətlərini növbəti mərhələyə qədər müəyyənləşdirmək, konsensusun formalaşması üçün mövcud vəziyyəti nəzərdən keçirmək və digər səbəblərdən dolayı atılan siyasi addım hesab etmək olar”, – deyə o, əlavə edib.
Siyasi şərhçinin sözlərinə görə, ilk baxışda baş verən hadisələrin sıralaması, telefon görüşü, rəsmi dövlət dairələrinin toplanması, sammit qərarı və digər vasitələr, sülh yolunda proseslərin getdiyini göstərir. Əslində isə vəziyyət heç də göründüyü kimi olmaya bilər.
“Telefon danışıqları, sammit qərarları, diplomatik cəhdlər və sairə digər addımlar olsa da, real nəticələrin əldə edilməsi üçün ilk növbədə atəşkəs rejiminə nail olmaq lazımdır və daha sonra əsir mübadiləsi və digər humanitar və texniki məsələlər üzərində razılığa gəlmək olar. Goründüyü kimi Tramp-Putin görüşündə bu istiqamətdə hələ ki heç bir addım atılmır. Bu baxımdan yaxın gələcəkdə Rusiya və Ukrayna arasında davam edən müharibənin sülh konturlarını görmək mümkünsüzdür”, – deyə o, bildirib.
Ziyafət Əlisoy