“Qayıdışın Hekayəsi”: Könüllülərin “Böyük Qayıdış” prosesində aktiv rolu işıqlandırılıb

Azərbaycan Respublikasının Gənclər Fondunun “Konstitusiya və Suverenlik İli” çərçivəsində elan etdiyi qrant müsabiqəsinin maliyyə dəstəyi ilə fərdi layihə rəhbəri Mənsumə Həbibli tərəfindən həyata keçirilən “Qayıdışın Hekayəsi” layihəsi müvəffəqiyyətlə başa çatıb.

Layihə çərçivəsində, video çəkiliş, montaj, jurnalistika və vizual hekayə anlatımı sahəsinə maraqlı olan gənclər iştirak etmişdir. İki günlük proqramın ilk günü Bakıda təşkil olunan hazırlıq mərhələsinə həsr olunub. Təlimçi Murad Ağayev tərəfindən keçirilən “Mobiloqrafiya” təlimində iştirakçılar “Storytelling” prinsipləri, müsahibə götürmə texnikası, kadrlama və mobil video bacarıqları üzrə nəzəri və praktik biliklər əldə edib.

Proqramın ikinci günü Zəngilan rayonunda çəkiliş, montaj və təqdimat sessiyaları ilə davam etdirilib.

Gənclər bu səfər zamanı vizual materialların çəkilişini həyata keçirərək “Böyük Qayıdış”prosesinə dəstək olan gənc könüllülərin fərdi təcrübələrini sənədləşdirmək imkanı qazanıb.

Layihə nəticəsində toplanan könüllülərin həyat hekayələri sənədləşdirilərək geniş ictimaiyyətə təqdim olunub.

Qarabağ və Şərqi Zəngəzur İqtisadi regionuna qayıdış prosesində gənc könüllülər mühüm rol oynayıb. “Qayıdışa dəstək” və “Zəfər yolu ilə” kimi proqramlar çərçivəsində gənclər yerli əhali ilə sosial əlaqələrin qurulmasında, media vasitəsilə informasiya yayımında və ölkə daxilində qayıdışla bağlı müsbət rəyin formalaşdırılmasında aktiv iştirak edib.

Layihənin əsas məqsədi gənclərin prosesə verdiyi töhfəni vurğulamaq və onları digər gənclər üçün nümunə kimi təqdim etmək olub.