Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi, Dövlət Gömrük Komitəsi və “Təmiz dünya” Qadınlara Yardım İctimai Birliyinin təşkilatçılığı ilə insan alverinə qarşı mübarizə mövzusuna həsr olunan təlim təşkil edilib.
“Xəbərsiz” bildirir ki, Dövlət Gömrük Komitəsinin Akademiyasında keçirilən tədbirdə Agentliyin və İnsan Alveri Qurbanlarına Yardım Mərkəzinin, eləcə də Akademiyanın əməkdaşları, İctimai Birliyin nümayəndələri və Komitənin ərazi və ixtisaslaşmış struktur bölmələrinin işçiləri iştirak ediblər.
Çıxışlar zamanı ölkəmizdə insan alverinə qarşı mübarizə sahəsində qurbanların hüquqlarının müdafiəsindən danışılıb. Həmçinin müxtəlif xidmətlər göstərməyə məcbur edilmə və insanların istismar edilməsinin digər formaları barədə məlumatlar verilib. İnsan alverinin gender xüsusiyyətləri, uşaqlara xas aspektləri, eləcə də bu sahədə preventiv hazırlığın gücləndirilməsindən bəhs edilib.
Təqdimatlarda insan alverinə qarşı mübarizənin əhəmiyyətinə, bu istiqamətdə ölkəmizdə görülən işlərə, eləcə də gömrük əməkdaşlarının bu mövzuda maarifləndirilməsinin əhəmiyyətinə diqqət çəkilib.
Sonda müzakirələr aparılıb və iştirakçıları maraqlandıran suallar cavablandırılıb.
