Rusiya istehsalat templərini artırmaqla öz hərbi-sənaye potensialını qoruyub saxlayır.
“Xəbərsiz” xəbər verir ki, Ukrayna Müdafiə Nazirliyinin Baş Kəşfiyyat İdarəsinin (GUR) məlumatına görə, rəsmi Moskva daxili ehtiyatlarını azaltmadan hər ay Ukrayna ərazisinə 100-ə qədər ballistik raket zərbəsi endirmək gücünə malikdir.
Kəşfiyyatın hesabatında Rusiyanın 2026-cı il üzrə raket istehsalı planları və cari göstəriciləri belə təsnif edilir:
“İskəndər” kompleksləri: Rusiya bu il ərzində “İskəndər” kompleksləri üçün 700-ə qədər raket istehsal etməyi planlaşdırır. Bu, təxminən ötən ilki istehsal həcmi ilə eynidir.
S-300 və S-400 sistemləri: Rusiyanın yerüstü hədəflərə zərbə endirmək üçün aktiv şəkildə istifadə etdiyi S-300 və S-400 zenit-raket kompleksləri üçün nəzərdə tutulan raketlərin istehsalı iki dəfədən çox artıb.
“Xəncəl” (Kinjal) raketləri: Moskva 2026-cı ilin sonuna qədər hərbi arsenalına daha 60 ədəd hipersəs sürətinə malik “Kinjal” raketi daxil etməyi hədəfləyir.
Ukrayna hərbi kəşfiyyatı vurğulayır ki, mövcud istehsal sürəti Rusiyaya cəbhədə və arxa cəbhədə yüksək intensivlikli raket hücumlarını davam etdirməyə və eyni zamanda ölkə daxilindəki strateji raket ehtiyatlarının sabit səviyyəsini qorumağa imkan verir.
