Yol hərəkəti qaydalarının pozulmasına görə tətbiq olunan cərimələrin vaxtında ödənilməməsi sürücülər üçün əlavə maliyyə yükü yaradır. Qanunvericiliyə əsasən, müəyyən edilmiş müddətdə ödənilməyən cərimələrə görə müxtəlif sanksiyalar tətbiq oluna bilər. Lakin bu məsələ birmənalı qarşılanmır. Xüsusilə də bəzi vətəndaşlar cərimələrin qanunsuz və ya mübahisəli olduğunu iddia etdikdə sual yaranır: inzibati xəta üzrə tətbiq olunan cərimə kredit və ya kommersiya borcu olmadığı halda, onun üzərinə əlavə faiz və ya maliyyə sanksiyasının hesablanması hüquqi və ədalətli yanaşma sayıla bilərmi?
“Xəbərsiz” xəbər verir ki,mövzu ilə bağlı Redaktor.az-a açıqlamasında iqtisadçı ekspert Xalid Kərimli bildirdi ki, bu məsələdə bir nüans var:
“Cəriməni 5 gün ərzində ödəsəniz, 10 faiz güzəşt tətbiq olunur. Bir ay ərzində ödəsəniz, məbləğ dəyişmir. Bir aydan sonra isə müəyyən faiz hesablanır və onun da limiti var, yəni bu, limitsiz deyil. Normal və ədalətli sistemdir. Dövlət vətəndaşa bir ay vaxt verir ki, cəriməni ödəsin. Hətta ilk 5 gün ərzində ödəyənlərə 10 faiz güzəşt tətbiq olunur. Yəni bir növ vətəndaşa təşəkkür edilir və cərimə məbləği azaldılır. Bu, normal və ədalətli yanaşmadır. Bir tərəfdən vətəndaşları qayda pozuntularından çəkindirməyə çalışır, digər tərəfdən isə cəriməni vaxtında ödəyənləri təşviq edir. Eyni zamanda ödəniş üçün bir aylıq möhlət də verilir. O ki qaldı cərimənin ədalətsiz olması məsələsinə, bunun üçün vətəndaşın hüquqi müdafiə imkanları var. Vətəndaş məhkəməyə müraciət edib qərardan şikayət verə bilər. Bu baxımdan mövcud mexanizmi normal, ədalətli və işlək sistem hesab edirəm”.
