Ukrayna Prezidenti Volodimir Zelenskinin Türkiyəyə səfəri Rusiya-Ukrayna müharibəsinin İstanbulda müzakirə olunacağı vacib diplomatik görüş kimi qiymətləndirilir. Məlumata görə, görüşdə Rusiya tərəfi iştirak etməyəcək, lakin ABŞ rəsmisinin iştirakı gözlənilir. Bu isə proseslə bağlı bir sıra suallar doğurur: Rusiyasız hansı danışıqlar aparıla bilər?
Bu barədə Siyasi şərhçi Cavanşir Abbaslı “Xəbərsiz”ə danışıb.
Abbaslı bildirib ki, Moskvanın iştirakı olmadan hərbi-siyasi məsələlərin tam həllindən danışmaq çətindir, amma Ukrayna cəbhəsindəki vəziyyətin müzakirəsi mümkündür. İstanbul kimi mühüm diplomatik məkanda həm ABŞ, həm də Rusiya nümayəndələrinin iştirak etməsi daha məqsədəuyğun olardı.
“Rusiya əvvəllər dəfələrlə danışıqlara hazır olduğunu bəyan edib, hətta Donald Tramp və Vladimir Putin arasında görüşün keçirilməsinə də müsbət yanaşacağını bildirmişdi. Amma Moskva bu dəfə görüşə qatılmır, bu isə müxtəlif suallar yaradır”, – o, əlavə edib.
Siyasi şərhçi hesab edir ki, Rusiyasız keçiriləcək danışıqların müharibənin gedişatına ciddi təsiri olmayacaq:
“Zelenskiyə müəyyən siyasi və hərbi dəstək vədləri verilə bilər. Amma bu vədlərin nə dərəcədə reallaşacağını demək indidən mümkün deyil, çünki son günlər Ukrayna cəbhəsində Rusiya ordusunun üstünlüyü müşahidə olunur. Məhz bu səbəbdən İstanbul görüşünün çağrıldığı ehtimalı böyükdür”.
Onun sözlərinə görə, Türkiyənin Rusiyaya qarşı sərt qərarların qəbulunda iştirak edəcəyini düşünmürəm. Çünki son proseslərə baxmayaraq, Ankara ilə Moskva arasında münasibətlər hələ də kifayət qədər yaxın olaraq qalır.
Ziyafət Əlisoy
