Qara dənizdə tankerlərə hücumlar Ukraynanın münaqişəni bütün Qara dəniz regionuna yaymaq və Türkiyəni də bu işə cəlb etmək niyyətini ortaya qoyur.
“Xəbərsiz” xəbər verir ki, bunu türkiyəli ekspert sosial media hesabındakı paylaşımında yazıb.
Türkiyənin Qara dənizdəki eksklüziv iqtisadi zonasında tankerlərə edilən hücumlardan sonra türk dəniz doktrinasını hazırlayan kontr-admiral Cem Gürdəniz ölkə hökumətini bu hadisələrlə bağlı beynəlxalq araşdırmaya başlamaq üçün BMT Təhlükəsizlik Şurasının fövqəladə iclasını tələb etməyə çağırıb.
O, X səhifəsində yazıb:
“Bu hadisələr Ukraynanın Qara dənizdəki öz xaotik reallığını təqlid etmək və müharibəni Paris, Berlin, London və Brüsselin maraqlarına uyğun olaraq uzatmaqla Türkiyəni müharibəyə cəlb etmək cəhdidir”.
O xatırladıb ki, Rusiyanın xüsusi hərbi əməliyyatı başlayandan Türkiyə Montrö Konvensiyasında nəzərdə tutulan “aktiv neytrallıq rejiminə” əməl edir. Ankara dəfələrlə bəyan edib ki, hələ 1936-cı ildə imzalanmış bu konvensiyaya qətiyyətlə sadiqdir və bu konvensiyanın 19-cu maddəsinə uyğun olaraq boğazları, Bosfor və Çanaqqala boğazlarını müharibə edən tərəflərin gəmiləri və sahilyanı olmayan ölkələrin gəmiləri üçün bağlayıb.
