Son illərdə xüsusilə tərkibindəki şəkərə görə mübahisəli olan portağal suyu və digər meyvə şirələrinin sağlamlığa təsiri yenidən müzakirə olunmağa başlayıb.
“Xəbərsiz” “Sabah” a istinadla xəbər verir ki, Türkiyəli kardioloq Erhan Gönen portağalın tərkibində olan antioksidant maddələrin damar sağlamlığını qorumaqda mühüm rol oynaya biləcəyini bildirib.
Həkim bildirib ki, bir insan bir oturuşda 3–4 portağalı rahatlıqla yeyə bilməz. Amma meyvə şirəsi hazırlanarkən adətən 3–4 portağaldan istifadə olunur və bu, qısa müddətdə qəbul edildikdə qanda şəkərin daha sürətlə yüksəlməsinə səbəb ola bilər.
Bundan əlavə, meyvə şirəsi hazırlanarkən meyvənin posa hissəsində olan liflər də böyük ölçüdə itirilir. Buna görə mümkün qədər meyvənin özünün yeyilməsi daha sağlamdır.
Həkim evdə hazırlanmış portağal suyunu daha yaxşı alternativ hesab edib.
“Həftədə bir neçə gün təxminən 300 millilitr təzə sıxılmış portağal suyu qəbul etməyin ürək və beyin sağlamlığına müsbət təsir göstərə biləcəyini göstərən araşdırmalar var”.
Ürək sağlamlığını qoruyur
Portağalın tərkibindəki flavonoidlər və antioksidant maddələr orqanizmdəki iltihabi prosesləri azaltmağa kömək edə bilər. Bu antioksidantlar damar divarındakı iltihabı azaldaraq infarkt riskinin aşağı düşməsinə töhfə verə bilər.
Eyni zamanda beyin damarları üzərindəki təsirləri sayəsində insult, Alzheimer və Parkinson kimi xəstəliklərin yaranmasına da müsbət təsir göstərə bilər.
Portağalın tərkibindəki liflər sayəsində bağırsaq sağlamlığına da müsbət təsir etdiyini bildirən həkim sağlam bağırsaq florasının orqanizmdə vitamin və antioksidantların mənimsənilməsinə birbaşa təsir etdiyini deyib:
“Bağırsaq sağlamlığı yaxşı olmadıqda C vitamini, B vitamini və flavonoid kimi faydalı maddələrin sorulması da azalır. Buna görə liflə zəngin meyvələr bağırsaq mikrobiotasını dəstəkləyərək ümumi sağlamlığa töhfə verə bilər”.
