Ekologiya və Təbii Sərvətlər Nazirliyi “Gəncə Avtomobil Zavodu” İstehsalat Birliyi ilə satınalma müqaviləsi imzalayıb.
“Xəbərsiz” Qaynarinfo-ya istinadla xəbər verir ki, müqavilədə MAZ 6312 C5 (6*4) markalı tullantı daşıyan avtomobillərin satın alınması nəzərdə tutulur. Müqavilənin maliyyə dəyəri 21 462 500 manatdır.
Satınalma proseduru birmənbə metodu ilə həyata keçirilib. Nazirliyin neçə ədəd nəqliyyat vasitəsi alacağı məlum deyil.
“Gəncə Avtomobil Zavodu”nun əsası 1986-cı ildə qoyulub. Müstəqilliyin ilk illərində zavod fəaliyyətini dayandırıb. 2004-cü ildə zavodun fəaliyyəti yenidən bərpa edilib.
Zavod vergi qeydiyyatına 1995-ci ildə alınıb. Açıq mənbələrdə zavodun nizamnamə kapitalı haqqında məlumat yoxdur. Zavodun direktoru Əliyev Amin Allahverdi oğludur. Müşahidə Şurasının sədri isə Xanlar Fətiyevdir.
Xanlar Fətiyev həm də deputatdır. O, parlamentdə 98 saylı Bərdə-Tərtər seçki dairəsini təmsil edir.
