Son illər Rusiya-Çin yaxınlaşmasında aktivlik daha çox görünməkdədir və iki ölkə arasında siyasi və iqtisadi baxımdan əldə edilən uğurlar fonunda həyata keçirilən səfərlər, görüşlər, təmaslar onu deməyə əsas verir ki, bütün bunlar dünya iqtisadiyyatına və siyasətinə, heç də az təsir göstərən amillərdən deyil.
Bu sözləri “Xəbərsiz”ə açıqlamasında siyasi şərhçi Çingiz Şahbazi deyib.
“Bu baxımdan iki ölkə arasında baş verən proseslər heç şübhəsiz ki, ilk növbədə ABŞ-yə qarşıdır və istər siyasi, istərsə də iqtisadi baxımdan ABŞ-ın yürütdüyü xarici siyasətə təsir etmək məqsədi daşıyır. Həmçinin, sanksiyalardan dolayı əziyyət çəkən Rusiya üçün, Çin Xalq Respublikası ilə əlaqələri daha da inkişaf etdirmək xüsusi əhəmiyyət kəsb edir. Belə bir vəziyyətdə, Çin Rusiyadan ucuz qiymətə aldığı enerji resurslarından və digər xam maldan dolayı, Rusiyanın haqlı olduğu məsələlərdə ona açıq şəkildə dəstək verməkdən imtina etmək niyyətində deyil”, – deyə o, əlavə edib.
Palitoloqun sözlərinə görə, bütün bunlar əlbətdə ki, ABŞ-ni narahat etməyə bilməz. Həmçinin Çin və Rusiya, ABŞ-ın “vahid qütblü dünya” modelinə qarşı çıxan ölkələr arasında əsas yerləri tuturlar və bu səbəbdən, “yeni dünya nizamı” modelində özünü yeni güç mərkəzi olaraq təsdiq etməyə çalışan ABŞ-yə qarşı Pekin və Moskva, özlərini alternativ qlobal nizamın memarları olaraq görürlər.
“Əldə olunan razılaşmalar və müqavilələr Rusiyanı ABŞ və Qərbin sanksiyalarından daha az zərərlə çıxmaqda manevr imkanlarını genişləndirməyə kömək edir və Rusiya,Çin bazarında və yuan ödəniş sistemində möhkəmlənir. Heç şübhəsiz ki, bunlar ABŞ-yə təsirsiz deyil və ABŞ-nin dollar sisteminə qarşı və sanksiya siyasətinə qarşı ciddi təsir göstərir. Rusiya və Çin birgə hərbi təlimlər keçirir və bu ABŞ və NATO-ya qarşı xüsusi narahatçılıq verici amildir”, – o, vurğulayıb.
Ç. Şahbazi əlavə edib ki, enerji və nəqliyyat dəhlizlərində əməkdaşlıqlar var. “Şimal Dəniz Yolu” və “Bir Kəmər, Bir Yol” lahiyələrinndə birlikdədirlər. Bundan əlavə hər iki ölkə beynəlxalq təşkilatlarda, BMT-də, BRICS-da və Şanxay Əməkdaşlıq Təşkilatında Qərb modelinə qarşı alternativ olaraq “beynəlxalq ədalət və suverenlik yanaşması” ideyası ilə birgə siyasət yürüdürlər. Bunlar hamısı ABŞ-a qarşı ideoloji baxımdan təsir mexanizmləridir və Vaşinqton üçün olduqca çətinliklər yaradır. Bu baxımdan Rusiya və Çin arasında təmaslar və strateji əlaqələr, ABŞ-ın dünya üzərində qurmaq istədiyi konsepsiyanın təsdiqlənməsində ciddi maneələr elementi olaraq qalacaq, kimi görünür.
Xəbərsiz.media
