ABŞ ilə Avropa İttifaqı ölkələrinin Rusiya – Ukrayna münaqişəsi ilə bağlı danışıqlara münasibəti bir-birinə ziddir.
Bu sözləri “Xəbərsiz”ə açıqlamasında siyasi şərhçi Abutalıb Səmədov deyib.
Onun sözlərinə görə, ABŞ qısa müddətdə sülhə nail olmaq istəyir:
“Tramp bu sülhün ona “Nobel” mükafatı gətirəcəyinə inanır. Aİ mümkün qədər sülh prosesini ləngitməyə çalışır ki, Ukrayna üçün ədalətli sülhə nail olunsun. Düzdür, onlar ədalətli sülhün mümkünsüzlüyünü də anlayırlar. Bu səbəbdən ABŞ üçün konstruktiv görünən sülh təklifləri Aİ və Ukrayna üçün qbuledilməzdir”.
Müsahibimiz bildirir ki, Trampın 28 bəndlik sülh təklifinin prinsipial bir neçə bəndi var ki, Avropa bu bəndləri heç bir şəkildə qəbul etmir. Söhbət ərazi itkiləri, Ukrayna ordusunun say məsələləri, təhlükəsizlik mövzuları və digər məsələlərdən gedir.
“Burada Avropa ilə Amerika Birləşmiş Ştatlarının mövqeyi qətiyyən üst-üstə düşmür. Ümumiyyətlə, bu mövqelərin üst-üstə düşmə ehtimalı da yoxdur. Bu səbəbdən də son danışıqlar barədə Aİ rəhbərliyinə məlumat verilmir. Ancaq Ukrayna nədən məlumat verməyib? Əsas müttəfiqini nə üçün məlumatlandırmayıb? Bu, kifayət qədər ciddi sualdır”, – deyə o, əlavə edib.
Siyasi şərhçi vurğulayır ki, Trampın sülh danışıqları üzrə nümayəndəsi Moskvaya gələcək. Danışıqlarda əldə olunan razılıqlar və təkliflər barədə Rusiya prezidenti ilə müzakirələr keçiriləcək. Bir şey aydındır – bu gün cəbhədə üstünlük Rusiyanın tərəfindədir. Ukrayna özünün əsas müttəfiqini – ABŞ-ni itirmək üzrədir. Avropa tələb olunan yardımları göstərmək gücünə malik deyil.
“Bu səbəbdən Rusiyadan güzəşt gözləmək qeyri-mümkündür. Burada yalnız danışıqlar prosesini uzatmaq, təklif olunan təslim aktını imzalamaqdan imtina etmək olar. Bu, Avropanın istəyidir. Həmçinin Azərbaycanın da maraqlarına cavab verən mövqedir. Rusiya Ukraynada nə qədər çox ilişib qalsa, həm biz, həm də digər dövlətlər üçün daha faydalı olar”, – deyə o, fikirlərini tamamlayıb.
Ziyafət Əlisoy
