Almaniya Ukraynaya yardım edən ölkələr arasında ön sıralarda yer alır və son aylarda Ukraynaya hərbi və maliyyə yardımlarını artırmaq niyyətində olduğunu bildirən bəyanatlarla çıxış edir.
Bu sözləri “Xəbərsiz”ə açıqlamasında siyasi şərhçi Çingiz Şahbazi deyib.
Onun sözlərinə görə, bu yardımlar Ukrayna hava sahəsini Rusiyanın hücumlarından müdafiə etmək məqsədilə verilməsi nəzərdə tutulan “Patriot”, “IRIS-T” və “Skynex” hava hücumundan müdafiə sistemlərini, tank və zirehli texnika üçün ehtiyat hissələrini, logistik və təlim dəstəyini, eləcə də enerji infrastrukturunun bərpası və maliyyə yardımlarını əhatə edir.
“Bu amillər, şübhəsiz ki, Almaniyanın Qərb alyansı, NATO və Avropa İttifaqı çərçivəsində Ukrayna məsələsində daha aktiv rol aldığını göstərir. Məhz bu səbəbdən Rusiya Almaniyanın bu istiqamətdə həyata keçirdiyi siyasətə qarşı kəskin mövqe nümayiş etdirir və sərt bəyanatlarla çıxış edir. Rusiya uzun müddətdir ki, Almaniyanın Ukraynaya verdiyi dəstəyi “Qərbin proksi savaşı” və “müharibəni uzadan amil” kimi qiymətləndirir. Yardımın artırılması Moskvanı, çox güman ki, daha da hiddətləndirəcək və siyasi baxımdan sərt bəyanatların verilməsi qaçılmaz olacaq. İki ölkə arasında diplomatik əlaqələrin gərginləşməsi, eləcə də iqtisadi və mədəni əməkdaşlığın inkişafına mənfi təsir göstərə biləcək problemlərin yaranması ehtimal olunur”, – deyə şərhçi əlavə edib.
Siyasi şərhçi qeyd edib ki, Rusiya mediası adəti üzrə bu dəfə də Almaniyanı “quru yuyub, yaş sərmək” taktikasından istifadə edəcək. Əlbəttə ki, minimum səviyyəyə enmiş Rusiya–Almaniya münasibətləri Ukraynaya göstəriləcək yeni yardım paketindən sonra, böyük ehtimalla, siyasi dialoqun dayanması ilə nəticələnə bilər. Bununla yanaşı, Rusiya enerji təzyiqini artırmağa da başlaya bilər.
Bu addımlar Almaniyada daxili auditoriyada siyasi gərginliyə səbəb ola bilər. Xüsusilə də populist qüvvələrin yardım paketinə qarşı çıxmaları, onlar üçün bir “fırsət” kimi dəyərləndirilə bilər və bu, mümkün ssenarilərdən biridir.
“Bununla belə, Almaniyanın bu addımı onun Avropa alyansı ölkələri arasında, ümumiyyətlə isə beynəlxalq miqyasda nüfuzunu artıracaq. Almaniya Rusiya ilə münasibətlərində qısamüddətli gərginlik yaşasa da, bu, Almaniya kimi bir ölkəyə qarşı ciddi təsir göstərəcək qədər əhəmiyyətli sayılmır, – Çingiz Şahbazi qeyd edib.
O, vurğulayıb ki, strateji baxımdan isə, Almaniyanın atdığı addımlar Avropanın uzunmüddətli müdafiə potensialının möhkəmləndirilməsinə xidmət edir və bu, onu təkcə NATO və Avropa İttifaqında deyil, həm də dünyanın əksər beynəlxalq təşkilatlarında əsas söz sahibinə çevrilmək hüququ ilə təmin edə bilər.
Ziyafət Əlisoy
