İçərişəhərin qədim divarları arasında müasir rəqsin vəhdəti “Circle Game” layihəsində bir araya gəlib. “CAVAN” Gənclər Hərəkatının təşkilatçılığı ilə keçirilən bu yarışma müxtəlif rəqs janrlarında fəaliyyət göstərən gənc iştirakçılar üçün həm yaradıcılıq meydanı, həm də peşəkar təcrübə mühiti yaradıb. Qeyd edək ki, layihə İçərişəhər Dövlət Tarix-Memarlıq Qoruğu İdarəsi, Azərbaycan Respublikasının Gənclər Fondu və Red Bull-un dəstəyi ilə həyata keçirilib.
Səhnədə nümayiş olunan performansların canlılığı tamaşaçılara unudulmaz anlar yaşadıb. Yarışma battle formatında təşkil edilib və iştirakçılar rəqabət ruhunu hiss edərək zirvə uğrunda mübarizə aparıblar.
“CAVAN” Gənclər Hərəkatının icraçı direktoru Ənvər İsmayılzadə qeyd edib ki, layihənin əsas məqsədi 16–29 yaş arası rəqqasları eyni səhnədə bir araya gətirərək onların potensialını üzə çıxarmaq və müasir rəqs mədəniyyətinin inkişafına dəstək göstərməkdir. O, xüsusilə gələcəkdə də rəqs müsabiqələrinin yenidən baş tutması üçün müxtəlif təşəbbüslərin həyata keçiriləcəyini vurğulayıb.
Münsiflər rəqqasların performanslarını qiymətləndirərək ən güclü çıxışları müəyyən ediblər. Sonda layihədə fərqlənən “Afina” ləqəbli Sofiya Xudaverdiyeva 1-ci yerə, “Mr. Ferzy” ləqəbli Fariz Musayev isə 2-ci yerə layiq görülərək mükafatlandırılıblar.
