Fəxri Xiyabanda hörmətsizlik: Ulu Öndərin məzarı önündə əli cibində dayanan məmur kimdir? - VİDEO

Ümummilli Lider Heydər Əliyevin vəfatının ildönümü ilə əlaqədar ölkə üzrə dövlət qurumları, vəzifəli şəxslər və vətəndaşlar tərəfindən Fəxri Xiyabana ziyarətlər təşkil olunduğu bir vaxtda, Xüsusi.tv-nin “qaynar xətt”inə daxil olan görüntülər ictimai müzakirələrə səbəb olub.

“Xəbərsiz”in məlumatına görə, 2025-ci ildə Mil-Muğan Regional Təhsil İdarəsinin qərarı ilə İmişli rayon təhsil sektoruna müdir vəzifəsinə təyin olunan Elşad Uğurliyevin Ümummilli Lider Heydər Əliyevin məzarını ziyarəti zamanı nümayiş etdirdiyi davranış cəmiyyətdə narazılıq doğurub. Sosial şəbəkələrdə yayılan fotogörüntülərdə vəzifəli şəxsin məzarı əli cibində ziyarət etməsi bəzi vətəndaşlar tərəfindən etik normalara zidd və hörmətsizlik kimi qiymətləndirilir.

Qeyd edək ki, Elşad Uğurliyev bundan əvvəl İ.Səfərov adına Yalavac kənd tam orta ümumtəhsil məktəbinin direktoru vəzifəsində çalışıb. Təhsil sektorunda rəhbər mövqedə olan bir şəxsin cəmiyyət üçün həssas hesab edilən bir gündə bu cür davranış nümayiş etdirməsi ictimaiyyətdə bir sıra suallar doğurur.

Məsələ ilə bağlı vətəndaşlar təhsil sektorunun rəhbər şəxslərinin gənc nəslə aşıladığı dəyərlər, eləcə də dövlətçilik və milli-mənəvi prinsiplərə münasibət barədə narahatlıqlarını ifadə edirlər.

İctimai gözlənti ondan ibarətdir ki, aidiyyəti qurumlar məsələni araşdıracaq, faktlara hüquqi qiymət veriləcək və dövlət qulluğunda etik davranış qaydalarının pozulması ilə bağlı prinsipial mövqe ortaya qoyulacaq. // Xüsusi.tv

https://youtube.com/shorts/dB51AkHQIWo?si=jvtFe2U83xxgG2vv