“Mal-qarasını otarmadığım üçün məni işdən çıxardı” - Gözətçidən direktora ittiham
“Cəlilabad rayonu Həsənli kənd orta ümumtəhsil məktəbinin direktoru Əliqismət Dadaşov onun mal-qarasını otarmadığım üçün yanvar ayında məni qeyri-qanuni şəkildə işdən çıxarıb.
“Xəbərsiz” “Qafqazinfo”ya istinadən xəbər verir ki, bu iddia ilə 11 ay əvvəl həmin məktəbdə gözətçi işləyən Taleh Saleh oğlu Əliyevdən gəlib.
Şikayətçinin sözlərinə görə, Dövlət Əmək Müfəttişliyi Xidmətinin işə bərpa ilə bağlı qərarı olsa da, direktor onu işə qaytarmayıb: “29 ildir həmin məktəbdə direktor işləyən Əliqismət Dadaşov mənə dedi ki, mal-qaramı otar, otarmadım. Ona görə məni işdən çıxardı. Məni aldatdı, Cəlilabada aparıb hansısa sənədə qol çəkdirərək məni işə qaytaracağını dedi, amma etmədi. Yerimə də qohumunu gətirib. 300 manat əməkhaqqı alırdım, 3 körpə övladım var, xəstə anam da himayəmdədir. Heç bir yerdə də işləmirəm. Onları nə ilə dolandıracağam?”
T.Əliyev deyir ki, direktor ona məktəbdə işləməyə yer verməyib: “Mənə dedi gəl məktəbdə qal, gəldim məktəbə, yer vermədi. Dedi ki, get köhnə məktəbdə qal. Köhnə məktəbdə də soyuq havada necə qalım? Dedim maşınla məktəbin həyətinə gəlim, maşında qalım heç olmasa. Onda da dedi ki, məktəbin həyətinə maşın salma, yolda saxla, yolda qal. Gözətçi işləyirdim. Məktəbin açarını istədim ki, heç olmasa içəridə qalım. Onu da vermədi ki, olmaz. Açarı məndən aldı, dilini dəyişib verəcəyini bildirdi. Məni aldatdı, aparıb rayonda qol çəkdirdi, məni işə qaytarmadı. Mən də məhkəməyə verdim. Məhkəmə oldu, amma Dadaşov məhkəməyə gəlmədi”.
Şikayətçinin bizə göndərdiyi 10 sentyabr 2025-ci il tarixli sənəddən məlum olur ki, Dövlət Əmək Müfəttişliyi Xidmətinin Lənkəran-Astara regional şöbəsinin rəisi Etibar Vəliyev adından göndərilən məktubda Cəlilabad rayon kənd ümumi orta məktəbi rəhbərliyinə 30 gün müddətində T.Əliyevi işə bərpa etməsi tapşırılıb.
Şikayətçi Taleh Əliyev bizə müraciətində eyni zamanda vurğulayıb ki, hazırda şikayət məhkəmə müstəvisində mübahisələndirilir. Birinci məhkəmə iclası keçirilsə də, direktor Əliqismət Dadaşov həmin prosesdə iştirak etməyib. İkinci məhkəmə isə dekabrın 4-nə təyin olunub.
İttihamlarla əlaqədar məktəb direktoru Əliqismət Dadaşovla əlaqə saxladıq. O, saytımıza açıqlamasında bildirdi ki, T.Əliyevin işdən azad edilməsi qanunvericiliyin tələblərinə tam uyğun olaraq həyata keçirilib: “Qeyd edirəm ki, Əliyev Taleh Sakit oğlu barəmdə yaydığı məlumatlarda həqiqətə uyğun olmayan və əsassız iddialar səsləndirir. Həmin şəxsin mənimlə bağlı hər hansı hüquqi əsası yoxdur. Onun tərəfimdən işdən azad edilməsi də qanunvericiliyin tələblərinə tam uyğun olaraq, qanunla əmək müqaviləsinə xitam verilməsi qaydasında həyata keçirilib. Araşdırılmamış və qərəzli informasiyanın tirajlanması həm mənim hüquqlarımın pozulması, həm də ictimaiyyətdə yanlış fikir formalaşdırılması deməkdir. Zərurət yaranacağı təqdirdə qanunla müəyyən edilmiş tədbirlər görmək hüququmu saxlayıram”.
