“Güclü Ermənistan” partiyasının lideri, Rusiyanın Kaluqa şəhərində yaşayan oliqarx Samvel Karapetyanın Ermənistanda keçiriləcək parlament seçkilərini rüşvəti yolu ilə saxtalaşdırmağa çalışdığı iddia olunur.
“Xəbərsiz” xəbər verir ki, bu barədə Medianews məlumat yayıb.
Nəşrin yazdığına görə, Karapetyanın tərəfdarları tərəfindən seçicilərin ələ alınması ilə bağlı çoxsaylı faktlar üzə çıxıb. Bildirilir ki, seçicilərə rüşvət verməkdə şübhəli bilinən bir sıra şəxslər artıq saxlanılıb.
Medianews iddia edir ki, Karapetyan rüşvəti təkcə Ermənistan ərazisində deyil, Rusiyada yaşayan Ermənistan vətəndaşları arasında da yaymağa çalışır.
Məlumata görə, Rusiyada yaşayan ermənilərə seçkiyə qədər Ermənistana gəlmək və Karapetyana səs vermək şərti ilə pul təklif olunur. Bəzi hallarda seçici rüşvətinin məbləğinin 100 min rubla çatdığı bildirilir.
Nəşr yazır ki, Rusiyada Karapetyan üçün rüşvət paylayan və alan şəxslərin siyahısı Ermənistan hüquq-mühafizə orqanlarının əlinə keçib. İddialara görə, həmin şəxslərin Ermənistana gəldikləri zaman saxlanılması istisna edilmir.
Medianews-un yaydığı bu məlumatlarla bağlı Samvel Karapetyanın və ya onun tərəfdarlarının mövqeyi hələlik açıqlanmayıb.
