Qəbələdə keçirilən Türk Dövlətləri Təşkilatının Zirvə Görüşü türk dünyası üçün sadəcə bir diplomatik tədbir deyil. Bu həm də inteqrasiya, təhlükəsizlik, enerji, nəqliyyat və milli həmrəylik məsələlərinin dərinləşməsi baxımından mühüm əhəmiyyət kəsb edir.
Prezident İlham Əliyevin Zirvə Görüşü çərçivəsində nitqi bu prosesin ideoloji, siyasi və strateji çərçivəsini formalaşdırır. İlham Əliyev çıxışında Azərbaycanı nəqliyyat, enerji və hərbi sahədə regional lokomotiv kimi təqdim etdi və bu statusun qorunması üçün konkret siyasi və praktiki addımlar təklif etdi.
Türk Dövlətləri Təşkilatını əməkdaşlıq platformasından daha çox ciddi geosiyasi mərkəz adlandıran dövlətimizin başçısı təhlükəsizlik məsələsi ilə bağlı çox ciddi mesajlar verdi. Prezident bildirdi ki, mövcud dünyada hərbi güc hər bir ölkənin müstəqilliyinin və ərazi bütövlüyünün əsas təminatıdır.
Əliyev nəqliyyat-logistika sahəsində Azərbaycanı beynəlxalq nəqliyyat mərkəzlərindən biri kimi təqdim etdi və bu statusun strateji elementləri sırasında Bakı-Tbilisi-Qars dəmir yolunu, Ələt Beynəlxalq Ticarət Limanını, Orta və Şimal-Cənub dəhlizlərini, Zəngəzur dəhlizi perspektivini qeyd etdi.
Enerji sahəsində Azərbaycanın 14 ölkəyə qaz ixracı və bərpaolunan enerji sahəsinə qoyduğu sərmayələrin ölkəmizin geoiqtisadi təhlükəsizlikdəki rolunu gücləndirdiyini bəyan etdi. Prezident çıxışında 1926-cı il Türkoloji Qurultayını xatırladaraq, bu tədbirin 100 illiyinin təşkilat çərçivəsində qeyd edilməsini təklif etdi.
Bu, təşkilatın yalnız iqtisadi və hərbi deyil, mədəni-mənəvi inteqrasiya platforması kimi də formalaşmasına çağırış idi. Hansı ki, bu, əsas təşəbbüskarlarından biri İlham Əliyevin olan türk dünyası həmrəyliyinin artırılması baxımından bu mühüm əhəmiyyət daşıyır. Digər türk dövlətlərinin də prosesdə fəal iştiraka əməkdaşlığın keyfiyyətcə mərhələyə qədəm qoyduğunu nümayiş etdirir.
Prezident İlham Əliyevin Qəbələ Zirvə Görüşündəki çıxışı Türk Dövlətləri Təşkilatının yaxın gələcəyini formalaşdıracaq əsas vizyon sənədlərindən biri kimi qiymətləndirilə bilər. Çıxışda təqdim olunan konseptlər – təhlükəsizlik, enerji, nəqliyyat, mədəni birlik və siyasi suverenlik təşkilat daxilində inteqrasiya dərinliyinin artacağına işarə edir.
Eyni zamanda, bu, Azərbaycanı regionun lider, dünyanın isə önəmli dövləti olaraq rolunu göstərir. Nəticədə Qəbələ Zirvəsi və Prezident İlham Əliyevin nitqi, Türk dünyasının XXI əsrdəki yeni yerini müəyyən edən əsas siyasi sənədlərdən birinə çevrilir.
Azər Niftiyev, siyasi şərhçi
