Bu gün İran sularını pozaraq Hörmüz boğazından gizli şəkildə keçməyə cəhd edən iki gəmi İran İslam İnqilabı Keşikçilər Korpusu (SEPAH) tərəfindən saxlanılıb və İran sularına geri qaytarılıb.
“Xəbərsiz” xəbər verir ki, bu barədə İran İslam İnqilabı Keşikçilər Korpusu (SEPAH) məlumat yayıb.
Məlumata görə, İsrailə məxsus “MSC-FRANCESCA” və “EPAMINODES” İran İslam İnqilabı Keşikçilər Korpusunun Dəniz Donanmasının dəfələrlə xəbərdarlıq etməsinə baxmayaraq gizli şəkildə Hörmüz boğazından keçməyə cəhd edib. SEPAH-ın Hərbi Dəniz Donanması sözügedən gəmiləri ələ keçirib. Hazırda bu gəmilər sənədlərin araşdırılması məqsədilə İran sularına yönəldilib.
“Bir daha bildirilir ki, Hörmüz boğazından keçmək və bu strateji yoldan təhlükəsiz keçidə zidd hər hansı fəaliyyət üzrə İran qanunları SEPAH Hərbi Dəniz Donanması tərəfindən davamlı şəkildə tətbiq olunur və qanunları pozanlar haqda qanun çərçivəsində tədbir görüləcək”, – SEPAH bildirib.
Qeyd edək ki, ABŞ və İran arasında nüvə proqramı ilə əlaqədar konkret nəticələr əldə olunmadığına görə, 28 fevralda ABŞ və İsrailin İrana qarşı hərbi hava hücumlara başlayıb və İran da həmin gündən İsraili və ABŞ-nin regiondakı obyektlərini raket və PUA ilə atəşə tutub. Pakistanın vasitəçiliyi ilə tərəflər arasında 7 apreldə 2 həftəlik atəşkəs razılaşması əldə olunub. 11 apreldə ABŞ və İran arasında İslamabadda keçirilən danışıqlarda razılaşma əldə olunmayıb.
Əlavə edək ki, 21 apreldə ABŞ prezidenti Donald Tramp İran təklifini təqdim edənə və danışıqlar bu və ya digər şəkildə başa çatana qədər atəşkəsi uzatdığını bildirib.
Xatırladaq ki, ABŞ 13 apreldən İrana limanlarına dəniz blokadası tətbiq edib. Buna cavab olaraq İran 18 apreldən Hörmüz boğazından keçən gəmilərə ciddi şəkildə məhdudiyyət tətbiq edib.
