Jurnalist Mikayıl Mirzəzadə yazır…
DİM sədri Məleykə Abbaszadə martın 9-da keçirilən imtahanla bağlı müsahibə verib. Müsahibə zamanı deyib ki, indiyədək test proqramına və ya dərsliyə uyğun olmayan sualların imtahana salınmasına dair iddiaları sübuta yetirən olmayıb:
“Bu iddianı səsləndirənlər hələ də ortaya konkret bir fakt qoya bilməyiblər. Buyurun göstərin, deyin ki, bax bu test proqrama və ya dərsliyə uyğun deyil. Belə fakt mövcud deyil”.
Birincisi, onun verdiyi müsahibə zamanı nitqində səsləndirdiyi ifadələrin, terminlərin və beynəlmiləl sözlərin heç biri ictimaiyyətin səbrini soyutmur. Əksinə, sınayır, daha da kasanı daşırır.
İkincisi, hörmətli Məleykə xanım, niyə yalnız təhsil ekspertlərini və müəllimləri çətin sualların salınması barədə iddiaları sübut etmədiklərinə görə günahlandırırsınız?
Məgər siz bu illər ərzində buraxılış imtahanının niyə məhz mart ayında keçirilməsi haqda bəlirli, əsaslı və lazımi açıqlama verə bilmisiniz? Heç bu müsahibədə də sözügedən məsələyə toxunmamısınız.
Digər bir məsələyə gəlincə, müsahibənizdə yenə əsassız danışaraq qeyd etmisiniz ki, məktəbdən kənar fərdi hazırlıqla məşğul olan – yəni çox zaman repetitor yanına gedən abituriyentlər imtahanın çətinliyindən danışırlar:
“Məktəbdən kənar fərdi hazırlıqla məşğul olan şəxslər və ya kurslar belə şagirdləri müəyyən vədlər verməklə özlərinə cəlb edirlər. Yekun nəticədə isə həmin şagirdlər iki il sonra lazımi balı toplaya bilmədikdə məsuliyyəti daha çox imtahanın və onun çətinliyinin üzərinə yükləməyə çalışırlar”.
Yaxşı, bəs hansı abituriyent bu gün deyə bilər ki, o, repetitor, yaxud kursa getməyərək, eyni zamanda evdə təkbaşına, intensiv şəkildə imtahana hazırlaşaraq yüksək nəticə göstərib?
Bu fikir birmənalı şəkildə absurddur. Çünki məktəblərdə olan müəllimlər, sinif rəhbərləri yalnız bayramlarda “şirinlik” alaraq şagirdə qiymət yazırlar. Nə zaman tam peşəkar şəkildə müəllim şagirdə nəsə öyrətmək istəyəndə abituriyent ondan qaçdı?
Düşünürəm ki, hər il rəsmi statistika fonunda çıxış edib özlərini təmizə çıxaran qurum Azərbaycanın gələcək nəsilləri üçün heç bir töhfə verə bilməz.
