Azərbaycanda daha 11 şəhərin baş planının təsdiqlənməsi nəzərdə tutulur.
“Xəbərsiz” xəbər verir ki, bunu Şəhərsalma və Arxitektura Komitəsinin sədri Anar Quliyev bu gün Bakıda keçirilən “Sahibkarlığın inkişafı güclü iqtisadiyyatdır” mövzusunda tədbirdə deyib.
Anar Quliyev bildirib ki, ölkədə iqtisadi inkişafın sürətləndirilməsi, sosial rifahın yüksəldilməsi və müasir şəhər mühitinin formalaşdırılması baxımından tikinti sektoru strateji əhəmiyyət daşıyan əsas sahələrdən biridir. Onun sözlərinə görə, bu sektor sahibkarlıq fəaliyyətinə, investisiya fəallığına və əhalinin mənzil təminatına birbaşa təsir göstərir.
Komitə sədri qeyd edib ki, əsas məqsəd şəhərləri yalnız fiziki infrastrukturun mövcud olduğu məkanlar kimi deyil, eyni zamanda güclü iqtisadi potensiala malik, yüksək sosial rifah səviyyəsi təmin edən və innovativ texnologiyalarla inteqrasiya olunmuş müasir inkişaf mərkəzləri kimi formalaşdırmaqdır.
O vurğulayıb ki, dövlət-özəl tərəfdaşlığının genişləndirilməsi və sahibkarların proseslərdə daha fəal iştirakı bu baxımdan xüsusi əhəmiyyət daşıyır. Yaşayış komplekslərinin, biznes mərkəzlərinin, sənaye zonalarının və ictimai infrastrukturun inkişafında bu əməkdaşlıq modelinin rolu böyükdür.
Anar Quliyev əlavə edib ki, “bir pəncərə” prinsipi əsasında Tikinti Elektron Portalının yaradılması tikinti fəaliyyətinin rəqəmsallaşdırılması istiqamətində mühüm addım olub. Onun sözlərinə görə, 2024-cü ildən etibarən tikintiyə və istismara icazələrin verilməsi, eləcə də aidiyyəti prosedurlar tam elektron qaydada həyata keçirilir. Bu isə inzibati müddətlərin azalmasına, bürokratik prosedurların sadələşdirilməsinə və şəffaflığın artırılmasına şərait yaradıb.
Komitə sədri həmçinin ərazi planlaşdırılması istiqamətində görülən işlərdən də danışıb. O bildirib ki, ölkənin 79 şəhərindən 68-nin yeni baş planı artıq təsdiq edilib.
“Qalan 11 şəhərin baş planının yenilənməsi istiqamətində işlər davam etdirilir. Yenilənmiş baş planların mövcudluğu şəhərlərin inkişafını proqnozlaşdırıla bilən müstəviyə çıxarır, investisiya cəlbediciliyi yaradır”, – deyə Anar Quliyev qeyd edib.
