Xəbərsiz Media
“Bank of America” analitikləri hesab edir ki, ABŞ-İran qarşıdurmasının hazırkı intensivliyi davam edərsə və Hörmüz boğazının açılması ilə bağlı irəliləyiş olmazsa, dünya bazarında neftin qiyməti 95-120 dollar aralığında qala bilər.
Bu barədə “Associated Press” bankın hesabatına istinadən məlumat yayıb.
Analitiklərin fikrincə, Hörmüz boğazından neft daşımalarının bloklanmasının davam etməsi qiymətlərin bu səviyyədə qalmasına səbəb ola bilər. Yaxın Şərqdə əsas enerji infrastrukturuna ciddi ziyan dəyərsə, neftin qiyməti 150 dollara qədər yüksələ bilər.
“Bank of America”nın baza ssenarisinə görə, Hörmüz boğazından neft tranziti tədricən bərpa olunarsa, ilin ikinci yarısında neftin orta qiyməti 83 dollar təşkil edəcək.
Hörmüz boğazı dünya üzrə neft ticarətinin təxminən 25 faizinin, mayeləşdirilmiş təbii qaz ticarətinin isə təxminən 20 faizinin keçdiyi əsas nəqliyyat marşrutlarından biridir.
