Xəbərsiz MediaMərasim İstanbulun Divan Kuruçeşme məkanında təşkil olunacaq. Bu il ilk dəfə olaraq MICHELIN Guide Türkiyənin qastronomiya xəritəsini ümummilli səviyyədə əhatə edəcək.
Tədbirdə 2027-ci il üzrə MICHELIN Guide Türkiyənin ilk ümummilli seçiminə daxil edilən bütün restoranlar təqdim olunacaq. Mərasim çərçivəsində qonaqpərvərlik və kulinariya sahəsində fərqlənən peşəkarlar üçün bir sıra xüsusi mükafatlar da təqdim ediləcək.
MICHELIN Guide 2022-ci ildə ilk dəfə İstanbul üzrə seçimlərini təqdim edib. Daha sonra bələdçinin əhatə dairəsinə İzmir, Muğla və Kapadokya da daxil edilib. Bundan sonra MICHELIN Guide müfəttişləri Türkiyənin müxtəlif bölgələrində araşdırmalarını davam etdirərək ölkənin zəngin kulinariya irsini və yeni qastronomiya məkanlarını öyrəniblər.
2027-ci il üzrə ümummilli seçim Türkiyənin müxtəlif bölgələrində formalaşan qastronomiya mədəniyyətinin zənginliyini, müxtəlifliyini və inkişaf dinamikasını daha geniş auditoriyaya təqdim etməyə imkan verəcək.
MICHELIN Guide-ın beynəlxalq direktoru Gwendal Poullennec bildirib ki, Türkiyənin kulinariya zənginliyi ölkədə fəaliyyətə başladıqları ilk gündən onların diqqətini cəlb edib.
“Türkiyə dərin köklərə malik regional kulinariya ənənələrindən müasir qastronomiya nümunələrinə qədər böyük müxtəliflik və yaradıcılıq təqdim edir. Müfəttişlərimiz ölkə üzrə səfərlərini davam etdirdikcə yeni və diqqətəlayiq restoranları, eləcə də kulinariya istedadlarını kəşf etmək həvəslərini qoruyurlar. MICHELIN Guide Türkiyənin ilk ümummilli seçimi bu müxtəlifliyi nümayiş etdirməyə və səyahətçilərə Türkiyənin aparıcı qastronomiya istiqamətlərindən biri kimi daha geniş mənzərəsini təqdim etməyə imkan verəcək”, – deyə o qeyd edib.
2027-ci il üzrə MICHELIN Guide Türkiyənin ümummilli seçiminə ilk dəfə daxil olan restoranların aşpazları, eləcə də MICHELIN ulduzlarına layiq görülən restoranların nümayəndələri mərasimdə bir araya gələcəklər.
Seçimin tam siyahısı tədbirdən dərhal sonra MICHELIN Guide-ın rəsmi internet saytında və mobil tətbiqində yayımlanacaq.
MICHELIN Guide 1900-cü ildə Michelin şin şirkəti tərəfindən avtomobillə səyahətin inkişafına dəstək məqsədilə yaradılıb. Bələdçi yarandığı gündən səyahətçiləri ən yaxşı restoranlara yönləndirməyi, seçilən kulinariya məkanlarını tanıtmağı və dünyada səyahət mədəniyyətinin inkişafına töhfə verməyi qarşısına məqsəd qoyub.
Restoranlar yalnız mətbəxin keyfiyyətinə əsaslanan beş universal meyar üzrə qiymətləndirilir:
inqrediyentlərin keyfiyyəti,
bişirmə texnikasına mükəmməl yiyələnmə,
dadların ahəngi,
aşpazın şəxsiyyətinin hazırlanan yeməklərdə əks olunması,
menyunun bütövlüyü və keyfiyyətin zamanla sabit saxlanılması.
MICHELIN Guide-ın seçiminə restoranlar yalnız kulinariya keyfiyyətinə əsasən daxil edilir. Qiymətləndirmələr dünyanın müxtəlif ölkələrində eyni metodologiyanı tətbiq edən, kimliklərini açıqlamayan müstəqil müfəttişlər tərəfindən aparılır.
Restoranlarla yanaşı, MICHELIN Guide Türkiyədə və dünyanın digər ölkələrində seçilmiş hotelləri də təqdim edir. Bu hotellərin ən fərqlənənlərinə MICHELIN Key mükafatı verilir.
MICHELIN Key hotellərin dizaynı, memarlığı, xidmət səviyyəsi və özünəməxsus xüsusiyyətləri nəzərə alınmaqla, qonaqlara yüksək səviyyəli və fərqli qalma təcrübəsi təqdim edən məkanları fərqləndirir. Seçilmiş hotelləri MICHELIN Guide-ın rəsmi internet saytı və mobil tətbiqi vasitəsilə bron etmək mümkündür.
