Dövlətin vəzifələrindən biri də öz vətəndaşlarının məşğulluq məsələlərini həll etməkdir.
Bu sözləri “Xəbərsiz”ə açıqlamasında təhsil eksperti Elşən Qafarov deyib.
Ekspert bildirir ki, Konstitusiyanın 35-ci maddəsinin 8-ci hissəsində göstərilir ki, dövlət məşğulluq məsələlərini həll edir. Bu nə deməkdir? Əmək bazarı və ölkədə kadr hazırlığı ilə məşğul olan təhsil müəssələri öyrənilməlidir. Nəticələr analiz edilib, buna uyğun şəkildə kadr hazırlığı aparılmalıdır.
“Hər il ali məktəblərə qəbulla bağlı ixtisasların təsnifatını Elm və Təhsil nazirliyi təqdim edir, bunu da Nazirlər Kabineti təsdiq edir. Yəni, hansı ali məktəbdə hansı ixtisas üzrə kadr hazırlığı olsun. Tələbə yerlərinin sayı da diqqət yetirilməli olan mövzudur. Bəs bizdə tələbə yerlərinin sayı, ixtisaslar və s. nəyin əsasında müəyyən edilir? Burada artıq məsələ labirintə düşür”, – deyə ekspert bildirib.
Onun sözlərinə görə, beynəlxaql təcrübədə əmək bazarı öyrənilir və hansı sahəyə kadlar lazımdırsa o sahələr üçün kadrlar hazırlanılır. Hətta regionlar da bu məsələdə ön planda dayanır ki, ora da ixtisaslı kadrlar göndərilir. Bizdə isə tendensiya belə davam etmir. Əmək bazarı öyrənilməli, buna uyğun kadrlar hazırlanmalıdır. Ölkədə əmək bazarının tələbləri öyrənilmir. Ona görə də kadr hazırlığı düzgün həyata keçirilmir.
Əli Hacı
