“Bu gün Ermənistan özünün “Müstəqilliyini” bayram edir. Bu sözü ona görə dırnaq arasında yazıram ki, baş nazirləri Ermənistanın ancaq indi müstəqil olmaq şansı əldə etdiyini deyir. Ona görə də Paşinyandan əvvəl o ölkəyə rəhbərlik etmiş Levon Ter-Petrosyan, Robert Köçəryan və Serj Sərkisyanın yaydıqları bəyanatda müstəqilliklərinin 34-cü ildönümündən dəm vurmaları sadəcə istehza doğurur”.
“Xəbərsiz” xəbər verir ki, bu fikirləri Milli Məclisin deputatı Sahib Alıyev deyib.
O bildirib ki, Ermənistan özünü müstəqil hesab edirsə, niyə Rusiya parlamentinin sədrinə “forpost” sözünə görə cavab verməmişdilər?
“Maraqlıdır, əgər onlar doğrudan da müstəqil dövlətə rəhbərlik edirdilərsə, onda Rusiya Dumasının keçmiş sədri Boris Qrızlov 2004-cü ilin dekabrında İrəvanda rəsmi səfərdə olarkən Ermənistanı “forpost” adlandıranda niyə biri də səsini çıxarmadı? Niyə etiraz etmədilər ki, ölkələri forpost deyil, müstəqil dövlətdir.
Serj Sarkisyan dünənki təbrikində “qəhrəmanlıq tarixi səhv ola bilməz” deyəndə yəqin Qarabağın işğalını nəzərdə tutur. Ancaq o da, ondan əvvəl SSRİ DTK-sının agenti olmuş və Ermənistana rəhbərlik etmiş hər iki sələfi də yaxşı bilirlər ki, bu “qəhrəmanlığın” arxasında hansı ölkənin hərbçiləri, desant qüvvələri dururdu. Bu işğal Sarkisyanların arzularını təmin etmək üçün yox, Ermənistanı boyunduruq altında saxlamaq, forpostluğunu əbədiləşdirmək məqsədilə reallaşdırılmışdı”.
Deputat qeyd edib ki, Serj Sarkisyan anlamalıdır ki, Xocalıda yandaşlarıyla törətdiyi qətliam unudulmayıb və bunun bədəlini ödəyəcəklər:
“Serjik öz təbrikində “qan su ola bilməz” ifadəsini də işlədir və bilmirəm bununla nə demək istəyir. Ancaq o anlamalıdır ki, yandaşlarıyla birgə tökdüyü qanları, Xocalıda etdiyi vəhşiliyi biz unutmamışıq, unutmayacağıq! Bunun bədəlini kim ödəməlidirsə, ödəyir və ödəyəcək!”.
“Xəbərsiz” informasiya portalı
